'పరకాల 9వ వార్డులో తెరాస చేసిన అభివృద్ధి శూన్యం'

వరంగల్​ నగరపాలక సంస్థ ఎన్నికల ప్రచారం ముమ్మరంగా సాగుతోంది. పరకాల పట్టణంలోని 9వ వార్డులో కాంగ్రెస్​ పార్టీ నేతలు ఇంటింటి ప్రచారం చేపట్టారు. ఎన్నికల్లో అధికార తెరాసకు ప్రజలు బుద్ధి చెప్తారని స్పష్టం చేశారు.

పోలింగ్​ దగ్గర పడుతున్న కొద్దీ గ్రేటర్​ వరంగల్​ ఎన్నికల ప్రచారం ఊపందుకుంది. పలు పట్టణాలు, వార్డుల్లో పార్టీలు ప్రచారం చేపట్టాయి. పరకాల పట్టణంలోని 9వ వార్డులో కాంగ్రెస్​ అభ్యర్థి ధర్నా వేణుగోపాల్ తరఫున యూత్​ కాంగ్రెస్​ వరంగల్​ గ్రామీణ జిల్లా అధ్యక్షులు కొయ్యడ శ్రీనివాస్​ ఇంటింటి ప్రచారం చేశారు.

అన్యాయాన్ని గుర్తించాలి..

బడుగు, బలహీన వర్గాల సంక్షేమం కోసం కాంగ్రెస్​ ఎంతో కృషి చేసిందని శ్రీనివాస్​ అన్నారు. ఎన్నికల ముందు హామీలిచ్చి ఆ తర్వాత వాటిని గాలికొదిలేసిన ఘనత తెరాసకే దక్కుతుందని విమర్శించారు. 9వ వార్డులో తెరాస చేసిన అభివృద్ధి శూన్యమని అన్నారు. వార్డు సమస్యలను ఎన్నిసార్లు తెరాస కౌన్సిలర్ దృష్టికి తీసుకెళ్లినా పట్టించుకోలేదని ఆరోపించారు. నిరుద్యోగులు, విద్యార్థులకు ప్రభుత్వం చేస్తున్న అన్యాయాన్ని గుర్తించి కాంగ్రెస్​ అభ్యర్థి వేణుగోపాల్​ను భారీ మెజార్టీతో గెలిపించాలని ఓటర్లను కోరారు.

ఇదీ చదవండి: రాష్ట్రంలో రాగల మూడ్రోజుల పాటు తేలికపాటి వర్షాలు