నమ్మకంతో ప్రభుత్వాస్పత్రుల్లో వైద్యం చేయించుకోండి...

ప్రభుత్వాసుపత్రులపై నమ్మకంతో వైద్యం చేయించుకోవాలని మంత్రి నిరంజన్​రెడ్డి సూచించారు. వనపర్తి జిల్లాలో పర్యటించిన మంత్రి... చిన్నపిల్లలకు రోటా వైరస్​ వ్యాక్సిన్ వేసే​ కార్యక్రమాన్ని ప్రారంభించారు. కార్యక్రమంలో కలెక్టర్​ శ్వేతా మహంతి పాల్గొన్నారు.

పసిపిల్లల్లో ప్రాణాంతకమైన రోగాలను నివారించేందుకు రాష్ట్ర వైద్య శాఖ తరఫున పదిరకాల వ్యాక్సిన్లు ఉచితంగా అందిస్తున్నట్లు వ్యవసాయశాఖ మంత్రి నిరంజన్​రెడ్డి పేర్కొన్నారు. వనపర్తి జిల్లా ఆస్పత్రిలో కేంద్రప్రభుత్వం కనుగొన్న రోటా వైరస్​ వ్యాక్సిన్​​ను ఏడాదిలోపు పిల్లలకు మందు వేసే కార్యక్రమాన్ని కలెక్టర్ శ్వేతా మహంతితో కలిసి ప్రారంభించారు. నిరుపేదలను దృష్టిలో ఉంచుకుని అతి ఖరీదైన రోటా వైరస్ వాక్సిన్​ను ప్రభుత్వం ఉచితంగా పంపిణీ చేస్తుందని మంత్రి తెలిపారు. ఏడాదిలోపు ఉన్న ప్రతీ చిన్నారికి గ్రామస్థాయిలోని ప్రతీ ఆశా కార్యకర్త తప్పకుండా అందజేస్తారని తెలియజేశారు. ప్రభుత్వాసుపత్రులపై ఉన్న అపనమ్మకాన్ని వదిలి... నమ్మకంతో వైద్యం చేయించుకోవాలని మంత్రి సూచించారు.

ఇవీ చూడండి: తోట రాముడు... ఇంట్లో కేటీఆర్ శ్రమదానం!