రైతు రాజు... కాదు కాదు.. రైతు బానిస.. ఊపేస్తోన్న నయా ర్యాప్

రైతు రాజు.. కాదు కాదు.. రైతు బానిస అంటూ.. రైతుల కష్టాలమీద ఈ మధ్య వచ్చిన ఓ ర్యాప్ ఆలోచించేలా చేస్తోంది. తెలుగులో ర్యాప్‌కి స్కోప్, ఆదరణ రెండూ తక్కువే. అయినా ఓ కుర్రాడు ఇవేవీ పట్టించుకోకుండా సామాజిక అంశాలపై ర్యాప్ చేస్తూ.. దూసుకెళుతున్నాడు. బాలీవుడ్, హాలీవుడ్ ర్యాపర్స్ నుంచి ప్రేరణ పొందిన ఈ కుర్రాడు మన సిద్దిపేట జిల్లా చిన్నకోడూరు మండలం గంగాపూర్​కు చెందిన దరిపెల్లి నవీన్.

అఘర్ దునియా మే సబ్ కంఫర్టబుల్ హోతే తో ర్యాప్ కౌన్ కర్తా? (నీలా ప్రతికూల పరిస్థితులు ఉన్న వారే సాధిస్తారు. అన్నీ అనుకూలంగా ఉంటే ర్యాప్ ఎవరు చేస్తారు?) ఎస్ నిజమే! ప్రతికూల పరిస్థితులను చూసి వెనకడుగు వేస్తే... మనలోని పట్టుదల, తెగువ, ధైర్యం చచ్చిపోతాయి. అన్ని మర్చిపోయి విజయకాంక్షనే లక్ష్యంగా ముందుకు సాగితే... నిన్ను కాదన్నవారే నీకు జేజేలు పలుకుతారు.

ర్యాప్.. అంటే ఏంటంటారా? అవును చాలా మంది ఇదే అడుగుతారేమో! తెలుగులో ర్యాపర్స్​కు పెద్దగా గుర్తింపు లేకపోయినా... హలీవుడ్, బాలీవుడ్​లో భలే క్రేజ్ ఉంది. ర్యాపర్స్ కష్టాల మీద ఇటీవల బాలీవుడ్​లో వచ్చిన గల్లీబాయ్ సినిమా మంచి విజయాన్ని అందుకుంది. అందులో హీరో మురాద్.. దిగువ మధ్యతరగతి కుటుంబానికి చెందిన వ్యక్తి. ర్యాపర్ కావాలని కలలుగని.. తన కలల్ని సాకారం చేసుకుని పెద్ద ర్యాపర్​గా అవతరిస్తాడు. ఇంచుమించు ఇదే స్టోరీ రియల్ లైఫ్​లోనూ ఉంది. మన సిద్దిపేట జిల్లా చిన్నకోడూరు మండలం గంగాపూర్ బిడ్డ ర్యాపర్​గా తన కలలను సాకారం చేసుకునే వేటలో పడ్డాడు. ఎంతకీ ఆ కుర్రాడు ఎవరంటే...

దరిపల్లి నవీన్.. రైతు కుటుంబానికి చెందినవాడు. ఊహ తెలిసినప్పటి నుంచి ర్యాపర్ కావాలనేదే కోరిక. తన కాంక్షను నెరవేర్చుకునేందుకు ప్రయత్నాలు మొదలుపెట్టాడు. మొదట్లో కష్టమైనా... ఇప్పుడు సాంగ్స్ బాగా ర్యాప్ చేయగలుగుతున్నాడు. నిజానికి తెలుగులో ర్యాపర్స్​కి పెద్దగా గుర్తింపు లేదు. మళ్లీ అడిగితే అసలు ర్యాప్ అంటే ఏమిటి?అని అడిగేవాళ్లు లేకపోలేదు. ఇప్పుడిప్పుడే వెలుగులోకి వస్తున్న రోల్ రైడా, నోయల్ సీన్, మరికొంతమంది తప్ప తెలుగులో ర్యాపర్స్ అంటే తక్కువనే చెప్పుకోవాలి. ఇలాంటి పరిస్థితుల్లో ర్యాపర్ కావాలని దృఢ నిశ్చయంతో ఉన్న నవీన్ చేసిన ర్యాప్ ఇప్పుడు జనాలను ఆకట్టుకుంటోంది.

అన్నదాత కష్టాల మీద ర్యాప్ సాంగ్ చేసిన నవీన్... ప్రస్తుతం బీఎస్సీ అగ్రికల్చర్ చివరి సంవత్సరం చదువుతున్నాడు. చిన్నప్పటి నుంచే బాలీవుడ్, హాలీవుడ్ ర్యాపర్ల నుంచి ప్రేరణ పొందిన నవీన్... తాను కూడా పెద్ద ర్యాపర్ కావాలని కలలు కన్నాడు. అంతటితో ఆగకుండా వాటిని సాకారం చేసుకునే దిశగా సాగిపోతున్నాడు.

రైతు కష్టాలను నవీన్ ర్యాప్ రూపంలో కళ్లకు కట్టినట్లు పాడాడు. రైతన్న శ్రమను అద్భుతంగా పాడి వినిపించిన నవీన్... తనలోని ర్యాపర్​ను చూపించాడు. " తేరే అందర్ కా లావా ఫట్ కే బాహర్ ఆనే దే ( నీలో రగులుతున్న ఉన్న లావా పగిలి బయటకు రానీ)" అని దీని అర్థం. అవును నవీన్​లో ర్యాపర్ కావాలనే కోరిక... లావాలా పగిలి బయటకు వస్తోంది. అందుకు నిదర్శనమే ఈ ర్యాప్....

" మూడు పుటల తింటరారా..

మూసుకోని ఉంటరారా...

రైతన్నకు కష్టమొస్తే నెత్తి తిప్పుకపోతరారా..

వంద ఏళ్లు బతకనికే కావాలి తిండి..

కానీ బతకాల్సిన రైతు చస్తే.. అంటవ్ నాకేంది..

రెండుపుట్ల తిండితిని చేస్తరు వ్యవసాయం..

మా వ్యవసాయమే దేశానికి అవుతుంది సాయం"

రైతు రాజు.. కాదు కాదు.. రైతు బానిస అంటూ నవీన్ చేసిన ర్యాప్... ప్రశంసలు అందుకుంటోంది. అతనిలో ఉన్న ర్యాపర్ కావాలనే కోరిక బలమైంది. దానికి తోడ్పాటునందిస్తే మరింత పదునెక్కుతాడు. ఇప్పుడిప్పుడే ర్యాపర్​గా ఎదుగుతున్న దరిపల్లి నవీన్ ప్రతిభను గుర్తించి.. వైరల్ చేయాల్సిన బాధ్యత మనందరిపై ఉంది. ఎందుకంటే ఈ కుర్రాడి టాలెంట్​ను నలుగురికి మనమే పరిచయం చేయాలి. ఎక్కడో సినిమాల్లో కాదు మనకూ ఉన్నాడు తెలుగు ర్యాపర్... తెలంగాణ ర్యాపర్. మన మధ్యలోనే ఉన్నాడు. మనోడిని మనమే పెద్ద ర్యాపర్​ను చేయాలి. కష్టపడటానికి నవీన్ సిద్ధంగా ఉన్నాడు. అతడి ప్రతిభను గుర్తించడానికి మన వంతు సాయం మనమూ చేద్దాం.

ఆల్ ది బెస్ట్ దరిపల్లి నవీన్.