'హుస్నాబాద్ ఎంతో మెరుగైన అభివృద్ధిని సాధిస్తోంది'

హుస్నాబాద్​లో పెట్రోల్ బంక్​ను ఎమ్మెల్యే సతీశ్ కుమార్ ప్రారంభించారు. గతంలో కంటే హుస్నాబాద్ ఎంతో మెరుగైన అభివృద్ధి సాధిస్తోందని సంతోషం వ్యక్తం చేశారు. అనంతరం అక్కన్నపేట మండలం చౌటపల్లి గ్రామంలో కబడ్డీ టోర్నమెంట్​కు హాజరయ్యారు. క్రీడాకారులను ఉద్దేశించి ప్రసంగించారు.

సిద్దిపేట జిల్లా హుస్నాబాద్​లోని కరీంనగర్ రహదారిలో ఉన్న శ్రీ పద్మాక్షి ఫిల్లింగ్ స్టేషన్​ను ఎమ్మెల్యే సతీశ్ కుమార్ లాంఛనంగా ప్రారంభించారు. ఈ సందర్భంగా పెట్రోల్ బంక్ యాజమాన్యానికి ఎమ్మెల్యే శుభాకాంక్షలు తెలిపారు. వినియోగదారులకు మంచి సేవలందించాలని ఆకాంక్షించారు. హుస్నాబాద్​లో కొత్త పెట్రోల్ బంక్​ అందుబాటులోకి రావడం హర్షణీయమన్నారు. వ్యాపార పరంగా హుస్నాబాద్ గతంలో కంటే ఎంతో మెరుగైన అభివృద్ధిని సాధిస్తోందని సంతోషం వ్యక్తం చేశారు.

అనంతరం అక్కన్నపేట మండలం చౌటపల్లి గ్రామంలో కబడ్డీ టోర్నమెంట్​కు ఎమ్మెల్యే హాజరయ్యారు. ఈ సందర్భంగా క్రీడాకారులను, నిర్వాహకులను పరిచయం చేసుకున్నారు. గ్రామంలో కబడ్డి నిర్వహణలో ముఖ్యపాత్ర పోషించిన ప్రో కబడ్డీ జాతీయ క్రీడాకారుడు గంగాధర మల్లేశ్​ను ఎమ్మెల్యే అభినందించారు. మానసిక, శారీరక వికాసానికి క్రీడలు దోహదం చేస్తాయన్నారు.

విద్యార్థులు, యువకులు క్రీడల్లో రాణించాలని, హుస్నాబాద్ నియోజకవర్గానికి మంచి పేరు ప్రఖ్యాతలు తీసుకురావాలని ఆకాంక్షించారు. గెలుపోటములు సహజమని ప్రతి ఒక్కరూ క్రీడా స్ఫూర్తిని అలవర్చుకోవాలని.. శారీరక దారుఢ్యాన్ని మెరుగుపరుచుకోవాలన్నారు. కార్యక్రమంలో ప్రో కబడ్డీ జాతీయ క్రీడాకారులు మల్లేశ్​, ప్రజా ప్రతినిధులు, గ్రామ ప్రజలు పాల్గొన్నారు.

ఇదీ చూడండి: 14 ఫేక్​ రుణాల యాప్‌లు.. అదుపులో నిందితులు