సిద్దిపేట జిల్లాలో ఈ ఏడాది రూ. 4కోట్ల 87 లక్షలతో చేప పిల్లలను పంపిణీ చేస్తున్నట్లు మంత్రి హరీశ్రావు అన్నారు. ఈ మేరకు చిన్న కోడూరు మండలం రంగనాయక సాగర్ ప్రాజెక్ట్, సిద్దిపేట కోమటి చెరువులో చేప పిల్లలు, రొయ్య పిల్లలను మంత్రులు హరీశ్ రావు, తలసాని శ్రీనివాస్ యాదవ్ విడుదల చేశారు. రాష్ట్ర వ్యాప్తంగా రూ. 93కోట్లతో చేప పిల్లలను పంపిణీ చేస్తున్నట్లు తలసాని పేర్కొన్నారు. మత్స్యకారుల అభివృద్ధి కోసం రాష్ట్ర వ్యాప్తంగా ఉచిత చేపపిల్లల పంపిణీ కార్యక్రమాన్ని సీఎం కేసీఆర్ ఆధ్వర్యంలో సిద్దిపేట నుంచే శ్రీకారం చుట్టినట్లు వెల్లడించారు.
ఏడేళ్ల కింద చేపలను ఆంధ్రా నుంచి దిగుమతి చేసుకునే వాళ్లం.. కానీ ఇప్పుడు విదేశాలకు ఎగుమతి చేసే స్థాయికి ఎదిగాం. తెలంగాణ చేపలు, రొయ్యలకు మంచి డిమాండ్ ఉంది. ఈ ఘనత సాధించడంలో సీఎం కేసీఆర్, మంత్రి తలసాని కృషి ఎంతో ఉంది. -హరీశ్ రావు, ఆర్థిక శాఖ మంత్రి
సీఎం కేసీఆర్ ఆధ్వర్యంలో సిద్దిపేట నుంచే ఈ కార్యక్రమానికి శ్రీకారం చుట్టాం. రాష్ట్ర వ్యాప్తంగా రూ. 93కోట్లతో చేప పిల్లలు, రొయ్య పిల్లల పంపిణీని చేపడుతున్నాం. -తలసాని శ్రీనివాస్ యాదవ్, మత్స్య, పశు సంవర్థక శాఖ మంత్రి
ఒకప్పుడు ఈ ప్రాంతంలో చుక్క నీరు ఉండేది కాదని మంత్రి హరీశ్ అన్నారు. కేసీఆర్ కృషితో ఇప్పుడు ఎటు చూసినా పచ్చదనమే కనబడుతోందని కొనియాడారు. ధాన్యం, చేప, రొయ్య పిల్లల భాండాగారంగా తెలంగాణ మారిందని పేర్కొన్నారు. నాణ్యమైన చేప, రొయ్యల పిల్లలను పంపిణీ చేస్తున్నామని చెప్పారు. తెలంగాణ చేపలు, రొయ్యలకు మంచి డిమాండ్ ఉందని హర్షం వ్యక్తం చేశారు.
ఇదీ చదవండి: Rain Effect: జలదిగ్బంధం నుంచి బయటపడుతున్న సిరిసిల్ల.. ఇక ఈ కష్టాలు మొదలు!!
