హిందువులకు దేశ వ్యాప్తంగా ఎంతో ప్రాశస్త్యంతో కూడిన ఆలయాలు అనేకం ఉన్నాయి. ఆర్థిక, శారీరక, ఆరోగ్య పరమైన కారణాలతో కొన్ని ఆలయాలకు వెళ్లడం అందరి వల్ల కాదు. కానీ ఆసక్తి ఉన్న వారందరికీ ఆ ఆలయాలు సందర్శించిన అనుభూతి కలిగించాలన్న ఉద్దేశంతో కొంతమంది భక్తులు.. ఆర్థిక మంత్రి హరీశ్ రావు అధ్యక్షతన.. సిద్దిపేట ధార్మిక ఉత్సవ సమితిని ఏర్పాటు చేశారు. ఈ సమితి ఆధ్వర్యంలో ప్రతి ఏటా శివరాత్రి సందర్భంగా సిద్దిపేటలో వివిధ మహిమాన్విత ఆలయాల నమూనాలు ఏర్పాటు చేస్తున్నారు. గత సంవత్సరం అమర్నాథ్ చేయగా.. ఈ సంవత్సరం ఛార్ దామ్ దర్శినిని ఏర్పాటు చేశారు.
ఛార్దామ్ యాత్ర నమూనా
ఆర్థికంగా, శారీరకంగా వ్యయప్రయాసలతో కూడిన ఛార్ దామ్ యాత్ర అనుకున్నంత సులువు కాదు. గడ్డకట్టుపోయే చలిలో ఈ యాత్ర చేయడం అందరి వల్ల కాదు. సిద్దిపేట ధార్మిక ఉత్సవ సమితి ఆధ్వర్యంలో సిద్దిపేట ప్రభుత్వ డిగ్రీ కళాశాల మైదానంలో.. పశ్చిమ బెంగాల్ కు చెందిన కళాకారులతో మంచుకొండలు, ఆలయాల భారీ సెట్టింగులు నిర్మిస్తున్నారు. 200మంది కళాకారులు మూడు షిప్టుల్లో పని చేస్తూ నమూనాలు తీర్చిదిద్దుతున్నారు.
ద్వాదశ జ్యోతిర్లింగాలు
ఛార్ ధామ్ యాత్రలో భాగంగా ఉండే యమునోత్రి, గంగోత్రి, కేధారినాథ్, బద్రినాథ్ ఆలయాలను ఏర్పాటు చేస్తున్నారు. భక్తులకు అసలైన యాత్ర చేసిన అనుభూతి కలిగేలా మంచుకొండలను సైతం ఏర్పాట్లు చేస్తున్నారు. వీటితో పాటు దేశం నలుమూలల విస్తరించి ఉన్న ద్వాదశ జ్యోతిర్లింగాలను సైతం ఏర్పాటు చేస్తున్నారు. పదో తేది నుంచి 12తేది వరకు ఈ ఉత్సవాలు జరగనున్నాయి.
ప్రతి ఒక్కరికి అవకాశం
ఈ కార్యక్రమంలో దేశం నలుమూలలకు చెందిన పీఠాధిపతులు పాల్గోనడం విశేషం. మాధవానంద సరస్వతి స్వామి, మధుసూధనానంద సరస్వతి స్వామి, విద్యా శంకర భారతి స్వామి, కృష్ణజ్యోతి స్వరూపానంద స్వామి, దుర్గా ప్రసాద్ స్వామి, శివాచార్య మహా స్వామిలు వివిధ పూజాధికాల్లో పాల్గోననున్నారు. నిరంతర బిల్వార్చన, నిరంతర అభిషేకాలతో పాటు లక్ష పుష్పార్చన, శివపార్వతుల కళ్యాణం, శాంతి కల్యాణం వంటి పూజా కార్యక్రమాలు నిర్వహిస్తున్నారు. ప్రతి భక్తుడు మహా లింగానికి అభిషేకం, బిల్వార్చన చేసేలా ఏర్పాట్లు చేస్తున్నారు.
జాగారానికి ఏర్పాట్లు
శివరాత్రి జాగారానికి సైతం భారీ ఏర్పాట్లు చేస్తున్నారు. శివరాత్రి సాయంత్రం ఆరు గంటల నుంచి మరుసటి రోజు ఉదయం 6గంటల వరకు.. సాంస్కృతిక శాఖ ఆధ్వర్యంలో కార్యక్రమాలు నిర్వహించనున్నారు. శివతత్వం, శివరాత్రి విషిష్టతలు వివరించేలా 300మంది ప్రముఖ కళాకారులచే 12గంటల పాటు నిరంతరాయంగా సాంస్కృతిక కార్యక్రమాలు ఏర్పాటు చేశారు.
బద్రినాథ్ దర్శనం
ఏటా కొన్ని నెలల పాటే తెరిచే కేధార్నాథ్ ఆలయంలో మహా శివరాత్రి రోజున కేదారేశ్వరుని దర్శనం వీలుపడదు. కానీ ఈ సంవత్సరం సిద్దిపేటకు వెళ్లే ఆ కేధారేశ్వరునితో పాటు బద్రినాథున్ని దర్శించుకోవచ్చు. రాష్ట్ర వ్యాప్తంగా ఉన్న భక్తులందరూ స్వామివారిని దర్శించుకునేలా.. పూజా కార్యక్రమాలను ఈటీవీ భారత్ ద్వారా ప్రత్యక్షప్రసారం చేయనున్నారు.
- ఇదీ చూడండి : యాదాద్రిలో ప్రారంభమైన మహా శివరాత్రి ఉత్సవాలు
