విద్యార్థుల హాజరు శాతాన్ని పెంచేందుకు వినూత్న పంథా ఎంచుకున్నాడు ఓ ప్రభుత్వ ఉపాధ్యాయుడు. పాఠ్యాంశాలను మైకు (లౌడ్ స్పీకర్)లో బోధిస్తూ పిల్లలను బడి వైపు ఆకర్షిస్తున్నారు. సంగారెడ్డి జిల్లా మునిపల్లి మండలం అల్లాపూర్ ప్రాథమిక పాఠశాలలో 61 మంది విద్యార్థులుండగా.. కరోనా నేపథ్యంలో తల్లిదండ్రులు విద్యార్థులను బడులకు పంపడం లేదు.
అల్లాపూర్లో చాలా కుటుంబాలు ఆర్థికంగా వెనుకబడినవే. విద్యార్థులను బడులకు పంపే ధైర్యం ఆ తల్లిదండ్రలకు లేదు. అలాగని స్మార్ట్‌ఫోన్లు కొనిపించి, పాఠాలు వినిపించే స్థోమతా.. వారికి లేదు. అలాంటి వారు విద్యకు దూరం కాకూడదనే ఉద్దేశంతో.. స్థానిక ప్రభుత్వ పాఠశాల ఉపాధ్యాయుడు నీలి లక్ష్మణ్ ఈ వినూత్న ఆలోచన చేశారు.
సొంత డబ్బులతో..
చరవాణులు, టీవీలు లేని విద్యార్థులు ఆన్లైన్ తరగతులు వినలేక విద్యా సంవత్సారాన్ని కోల్పుతున్నారని గుర్తించారు నీలి లక్ష్మణ్. సొంతంగా రూ. 15 వేలు ఖర్చు చేసి లౌడ్ స్పీకర్లను కొనుగోలు చేసి పాఠశాలపై ఏర్పాటు చేయించారు. ఆన్లైన్లో వచ్చే పాఠ్యాంశాలతో పాటు తాను బోధిస్తూ విద్యార్థులకు ఆసరాగా నిలుస్తున్నారు. పిల్లలు సమయానుకూలంగా పాఠాలు వింటూ ప్రయోజనం పొందుతున్నారు. ఉపాధ్యాయుడి అంకితభావాన్ని గ్రామస్థులు అభినందిస్తున్నారు. పిల్లలను బడికి పంపేందుకు ముందుకొస్తున్నారు.
ఇదీ చదవండి: విద్యార్థులు, ఉద్యోగులు, న్యాయవాదులతో తెరాసది పేగుబంధం: కేటీఆర్‌
