A baby was abandoned in Sangareddy district: ఆడపిల్ల పుట్టిందంటే చాలు చాలా మంది బరువు అనుకొంటారు. ఆ పిల్లని పెంచి, పోషించి... ఇంకొకరితో పెళ్లి చేసి పంపించడం ఇదంతా బాధ్యతగా కాకుండా బరువుగా అనుకొంటారు. దీంతో కొంత మంది ఆడపిల్ల పుట్టగానే తమకు అక్కర్లలేదనుకొంటారు. ఇలాంటి ఘటనే సంగారెడ్డి జిల్లా జహీరాబాద్ మండలం బూచినెల్లిలో చోటుచేసుకుంది. అప్పుడే పుట్టిన పసికందును గుర్తు తెలియని వ్యక్తులు మానవత్వం లేకుండా ముళ్ళపొదల్లో పడేశారు. పసికందు ఏడుపులు విన్న స్థానికులు చిరాగ్ పల్లి పోలీసులకు సమాచారం అందించారు.
ఘటనా స్థలానికి చేరుకున్న ఎస్ఐ కాశీనాథ్ పోలీసు వాహనంలోనే జహీరాబాద్ ఏరియా ఆసుపత్రికి శిశువును తరలించారు. శిశువు తక్కువ బరువుతో పుట్టడం వలన పరీక్షలు నిర్వహించిన వైద్యులు పసికందును సంగారెడ్డిలోని జిల్లా ఆసుపత్రికి తరలించారని సూచించారు. ఐసీడీఎస్ సిబ్బంది సహకారంతో ఆడ శిశువును జిల్లా ఆసుపత్రిలోని మాతా శిశు కేంద్రానికి తరలించారు. పసికందును పారవేసిన ఘటనపై అంగన్ వాడీ, ఆశా కార్యకర్తలతో దర్యాప్తు చేసి బాధ్యులను గుర్తిస్తామని చిరాగ్పల్లి పోలీసులు తెలిపారు.
"ఎవరో గుర్తు తెలియని వ్యక్తులు పసిపిల్లని పొదల్లో పడేశారని స్థానికులు సమాచారం ఇవ్వడంతో ఘటనా స్థలిని చేరుకున్నాము. అక్కడి నుంచి ఆస్పత్రికి తరలించాము. చంద్రకళ అంగన్వాడీ టీచర్ ఫిర్యాదు మేరకు కేసు నమోదు చేశాము. తదుపరి దర్యాప్తు చేపడతాము." - ఎమ్. కాశీనాథ్, స్థానిక ఎస్ఐ
ఇవీ చదవండి:
