ఆర్టీసీని ప్రభుత్వంలో విలీనం చేయాలని చేస్తున్న డిమాండ్ విషయంలో ఎట్టి పరిస్థితుల్లోనూ వెనక్కి తగ్గేది లేదని ఆర్టీసీ ఐకాస కన్వీనర్ అశ్వత్థామ రెడ్డి స్పష్టం చేశారు. రంగారెడ్డి జిల్లా షాద్నగర్ పట్టణంలో ఆర్టీసీ కార్మికులు చేపడుతున్న సమ్మెకు ఆయన హాజరయ్యారు. విలీనం విషయంలో కార్మికులు వెనక్కి తగ్గారని తప్పుడు ప్రచారాలు చేయడం సరికాదన్నారు. కార్మికులు మొత్తం 26 డిమాండ్లను ప్రభుత్వం ముందుంచారని... విలీనం సహా ఏ డిమాండ్ విషయంలోనూ వెనక్కి తగ్గేది లేదన్నారు. ప్రభుత్వం ఎన్ని బెదిరింపులకు పాల్పడినా... కార్మికుల పక్కన న్యాయం ఉందని వారు ధైర్యంగా పోరాటం సాగించాలన్నారు. తాము చేస్తున్న పోరాటం వల్ల ప్రజలకు కూడా ఇబ్బందులు తప్పుతాయని వెల్లడించారు. ప్రభుత్వం ద్వారా కొత్త బస్సులు ఇవ్వాలని... కాలం చెల్లిన బస్సులను తొలగించాలని తాము కోరుతున్నామని తెలిపారు. దీనివల్ల పల్లెపల్లెకు బస్సు సాధ్యమవుతుందని పేర్కొన్నారు. ఈ సందర్భంగా బస్టాండ్లో బైఠాయించిన కార్మికులు ప్రభుత్వానికి వ్యతిరేకంగా నినాదాలు చేశారు.
ఇవీ చూడండి: ఆర్టీసీపై పటిష్ట కార్యాచరణతో ముందుకెళ్దాం: కోదండరాం
