ఎన్నో సామాజిక కార్యక్రమాలు నిర్వహిస్తున్న రామోజీ పౌండేషన్.. పోలీస్ శాఖకు తన వంతు సాయం అందించేందుకు నిర్ణయించుకుంది. ఇందులో భాగంగా రంగారెడ్డి జిల్లా అబ్దుల్లాపూర్మెట్ పోలీస్ స్టేషన్ నూతన భవనాన్ని నిర్మించి ఇచ్చేందుకు రామోజీ ఫౌండేషన్ ముందుకు వచ్చింది. రామోజీ ఫిల్మ్ సిటీ సమీపంలో జాతీయ రహదారి పక్కనే అధునాతన భవన నిర్మాణానికి భూమిపూజ, శంకుస్థాపన చేశారు.
ఈ కార్యక్రమంలో మంత్రులు సబితా ఇంద్రారెడ్డి, ఎర్రబెల్లి దయాకర్రావు, ఎంపీ కోమటిరెడ్డి వెంకటరెడ్డి, ఎమ్మెల్యే మంచిరెడ్డి కిషన్రెడ్డి, రాచకొండ సీపీ మహేశ్ భగవత్, రామోజీ ఫిల్మ్ సిటీ ఎండీ విజయేశ్వరి పాల్గొన్నారు. సామాజిక కార్యక్రమాలు చేస్తున్న రామోజీ ఫౌండేషన్ను మంత్రులు అభినందించారు. రాష్ట్ర పోలీసులు.. దేశానికే ఆదర్శంగా నిలుస్తున్నారని, అలాంటి వారికి భవనం నిర్మించి ఇస్తున్నందుకు రామోజీ ఫౌండేషన్కు ప్రభుత్వం తరఫున.. మంత్రులు ధన్యవాదాలు తెలిపారు.
అబ్దుల్లాపూర్మెట్ పోలీస్ స్టేషన్ 2017 అక్టోబర్ 11న అందుబాటులోకి వచ్చింది. జాతీయ రహదారి పక్కనే తాత్కాలిక భవనంలో పోలీస్ స్టేషన్ను కొనసాగిస్తున్నారు. ప్రస్తుతం కొనసాగుతున్న భవనం కూడా రామోజీ ఫౌండేషన్ ఆధ్వర్యంలో ఇచ్చారు. మూడున్నరేళ్లుగా అబ్దుల్లాపూర్మెట్ పోలీస్ స్టేషన్ ఆ భవనంలోనే కొనసాగుతోంది. ఆధునిక సదుపాయాలతో కూడిన విశాలమైన భవనాన్ని నిర్మించి ఇచ్చేందుకు రామోజీ ఫౌండేషన్ ముందుకు వచ్చింది. ఏడాది లోపు ఈ భవనాన్ని పూర్తి చేసి పోలీస్ శాఖకు అప్పజెప్పనున్నారు.
ఆధునిక సదుపాయాలు.. ఆహ్లాదకరమైన వాతావరణం
భవనం గ్రౌండ్ ఫ్లోర్తో పాటు మొదటి అంతస్తు కలిపి 9 వేల చదరపు అడుగుల్లో నిర్మిస్తున్నారు. పీఎస్ ప్రాంగణంలో ఆహ్లాదకరమైన వాతావరణం ఉండేలా నిర్మాణం ఉండనుంది. భవనం లోపల సీఐకి ప్రత్యేక గదితో పాటు డిటెక్టివ్ డిపార్ట్ మెంట్కు ప్రత్యేక గదులు ఉండనున్నాయి. హాల్లో రిసెప్షన్తో పాటు, ఎస్సైలు కూర్చోవడానికి క్యాబిన్లు ఏర్పాటు చేసేలా నిర్మాణం ఉంటుంది. భవనం బయటి నుంచి చూడగానే ఆకట్టుకునే విధంగా డిజైన్ చేశారు. పోలీసులకు విశ్రాంతి గది, మహిళా కానిస్టేబుళ్లకు ప్రత్యేక గదులూ ఇందులో ఉండనున్నాయి.
అబ్దుల్లాపూర్మెట్ పీఎస్ పరిధిలో దాదాపు 60 వేల జనాభా ఉంది. సీఐ, ఇద్దరు ఎస్సైలు, ఏఎస్సై, ఇద్దరు హెడ్ కానిస్టేబుళ్లు, 8 మంది కానిస్టేబుళ్లు, నలుగురు హోంగార్డులు విధులు నిర్వహిస్తున్నారు. 24 గ్రామాలు పీఎస్ పరిధిలోకి వస్తాయి. హైదరాబాద్- విజయవాడ జాతీయ రహదారిలో కొన్ని కిలోమీటర్లు కూడా పీఎస్ పరిధిలోకి వస్తుంది. భవిష్యత్ అవసరాలను దృష్టిలో ఉంచుకొని పోలీస్ స్టేషన్ను నిర్మిస్తున్నారు. సిబ్బంది పెరిగినా తగిన విధంగా సర్దుబాటు అయ్యేలా విశాలంగా నిర్మించనున్నారు. నూతన భవన నిర్మాణానికి శంకుస్థాపన జరగడంపై పోలీసులు ఆనందం వ్యక్తం చేస్తున్నారు.
రాచకొండ కమిషనరేట్కు నేటికి ఐదేళ్లు..
2015 జులై 1న రాచకొండ కమిషనరేట్ ప్రారంభమైందని సీపీ మహేశ్ భగవత్ తెలిపారు. నేటికి ఐదేళ్లు గడిచిందన్నారు. ఇదే రోజున అబ్దుల్లాపూర్మెట్ పీఎస్ నూతన భవనానికి శంకుస్థాపన చేయడం ఆనందంగా ఉందన్నారు.
ప్రభుత్వం తరఫున కృతజ్ఞతలు..
ఈ రోజు చాలా సంతోషంగా ఉంది. రామోజీరావు తన సంస్థ తరఫున సుమారు రెండు కోట్ల రూపాయలు ఇచ్చి అబ్దుల్లాపూర్మెట్ పోలీస్స్టేషన్ కట్టించడం హర్షించ దగ్గ విషయం. ప్రభుత్వం తరఫున కృతజ్ఞతలు తెలియజేస్తున్నా. వారు సేవా కార్యక్రమాలు చాలా చేశారు. రామోజీరావు ఆరోగ్యం, వారి కుటుంబం బాగుండాలని కోరుకుంటున్నా.
-ఎర్రబెల్లి దయాకర్రావు, రాష్ట్ర పంచాయతీరాజ్ శాఖ మంత్రి
మేముసైతం..
అబ్దుల్లాపూర్మెట్ పోలీస్స్టేషన్ అధునాతన భవనానికి రామోజీ ఫౌండేషన్ తరఫున సుమారు రూ.2 కోట్లు ఇవ్వడం పట్ల ప్రభుత్వం తరఫున కృతజ్ఞతలు తెలియజేస్తున్నా. దినదినాభివృద్ధి చెందుతున్న నగరం కోసం మేము సైతం అని ముందుకొచ్చిన రామోజీరావుకు ధన్యవాదాలు. దేశంలోనే నంబర్ 1గా పేరొందిన తెలంగాణ పోలీసులకు అండగా నిలిచిన పెద్దలకు నమస్కారం.
- సబితా ఇంద్రారెడ్డి, రాష్ట్ర విద్యాశాఖ మంత్రి
ఇదీచూడండి: Minister srinivas Goud : మీ వాటా తేల్చుకుని.. నీళ్లు తీసుకెళ్లండి
