Revanth Reddy on Crop Damage in Telangana: నిజామాబాద్ జిల్లా కోటగిరి మండలంలోని సుంకిని పోతాంగల్లో వడగళ్ల వానతో దెబ్బతిన్న పంటలను టీపీసీసీ అధ్యక్షుడు రేవంత్రెడ్డి పరిశీలించారు. అకాల వర్షాల వల్ల మామిడి, మొక్కజొన్న, ఇతర పంటలు దెబ్బతిని తీవ్ర నష్టం వాటిల్లిందని అన్నదాతలు రేవంత్ దృష్టికి తీసుకొచ్చారు. ఈ సందర్భంగా రాష్ట్రంలో దాదాపు 5 లక్షల ఎకరాల్లో పంట నష్టం వాటిల్లిందని.. వ్యవసాయ, రెవెన్యూ అధికారులు గ్రామాల్లో దెబ్బతిన్న పంటల వివరాలు నమోదు చేసి ప్రభుత్వానికి నివేదిక ఇవ్వాలని రేవంత్ రెడ్డి పేర్కొన్నారు. ఆ నివేదికలను కేంద్ర ప్రభుత్వానికి అందించి.. పరిహారం అందేలా చూడాలని డిమాండ్ చేశారు.
ఈ క్రమంలోనే కాంగ్రెస్ హయాంలో అకాల వర్షాలకు పంటలు కోల్పోయిన రైతులకు పరిహారం అందించి ఆదుకున్నట్లు రేవంత్రెడ్డి పేర్కొన్నారు. అన్నదాతలకు ఎకరాకు రూ.40 వేల వరకు సాయం అందించినట్లు తెలిపారు. తెలంగాణ వచ్చాక ప్రభుత్వం విత్తనాలు, ఎరువులు, పనిముట్లపై సబ్సిడీ ఇవ్వడం లేదని ఆరోపించారు. కేసీఆర్ సర్కార్ రైతుల పట్ల దుర్మార్గంగా వ్యవహరిస్తోందని మండిపడ్డారు. పంట బీమా పథకాన్ని నీరుగార్చారని.. కేంద్ర ప్రభుత్వ ఫసల్ బీమా పథకం రాష్ట్రంలో లేకపోవడంతో రైతన్నలు నష్టపోతున్నారని తెలిపారు. 2021లో కామారెడ్డి జిల్లా బాన్సువాడ నియోజకవర్గంలో ఒకే మండలంలో 8 వేల ఎకరాల పంట నష్టం జరిగితే.. 15 నెలలు గడుస్తున్నా పరిహారం అందించలేదని విమర్శించారు. తెలంగాణ ప్రభుత్వ చేతకానితనానికి ఇదొక నిదర్శనమన్నారు.
బీజేపీ ఎంపీలు ఉత్సవ విగ్రహాలు..: తక్షణమే ప్రభుత్వం స్పందించి దెబ్బతిన్న పంటలకు ఎకరాకు రూ.15 వేల చొప్పున పరిహారం అందించాలని రేవంత్రెడ్డి డిమాండ్ చేశారు. ఈ క్రమంలోనే బీజేపీ ఎంపీలు, కేంద్రమంత్రి కిషన్ రెడ్డి ఉత్సవ విగ్రహాలుగా మారారని.. పంట నష్టం జరిగి రైతులు బాధపడుతుంటే ఆ పార్టీ నేతలు ఎందుకు క్షేత్ర స్థాయిలో పర్యటించడం లేదని ప్రశ్నించారు. రైతులకు అండగా నిలవడంలో కేంద్ర, రాష్ట్ర ప్రభుత్వాలు విఫలం చెందాయని.. కేంద్రం తక్షణమే బృందాలను పంపి ఇన్పుట్ సబ్సిడీ అందించాలన్నారు. కేసీఆర్ సర్కారు రైతు బీమా కాదు.. పంట బీమా పథకం అమలు చేయాలని రేవంత్ హితవు పలికారు.
''వ్యవసాయ, రెవెన్యూ అధికారులు తక్షణమే గ్రామాల్లో పర్యటించి పంట నష్టంపై నివేదిక తయారు చేసి రాష్ట్ర ప్రభుత్వానికి అందించాలి. ఆ నివేదికను కేంద్ర ప్రభుత్వానికి పంపించి పరిహారం అందేలా చూడాలి. బీజేపీ ఎంపీలు, కేంద్రమంత్రి కిషన్ రెడ్డి ఉత్సవ విగ్రహాలుగా మారారు. పంట నష్టం జరిగి రైతులు బాధపడుతుంటే ఆ పార్టీ నేతలు క్షేత్ర స్థాయిలో ఎందుకు పర్యటించడం లేదు. కేంద్రం తక్షణమే బృందాలను పంపి ఇన్పుట్ సబ్సిడీ అందించాలి. కేసీఆర్ సర్కార్ రైతు బీమా కాదు.. పంట బీమా పథకం అమలు చేయాలి.'' - రేవంత్రెడ్డి, టీపీసీసీ అధ్యక్షుడు
ఇవీ చూడండి..
