MP Arvind reacted to the yellow flexi set up in Nizamabad: నిజామాబాద్ జిల్లాలో పసుపు బోర్డుపై వెలసిన ఫ్లెక్సీలపై ఎంపీ ధర్మపురి అర్వింద్ స్పందించారు. జిల్లాలో వేరు వేరు చోట్ల పసుపు రంగు హోర్డింగ్లు ఏర్పాటు చేసి ఇదే ఎంపీ తెచ్చిన పసుపు బోర్డు అని రాశారు. ఈ ఫ్లెక్సీలపై అర్వింద్ ఒక వీడియో విడుదల చేశారు. రాష్ట్ర ప్రభుత్వం రైతు సమస్యలు పరిష్కరించలేక ఇలాంటి పనులకు పాల్పడుతున్నారని అర్వింద్ అన్నారు.
పార్లమెంట్లో బీఆర్ఎస్ ఎంపీలు నిజామాబాద్లో పసుపు బోర్డు ఏర్పాటు గురించి అడిగినప్పుడు.. దేశంలో ఎక్కడా లేని విధంగా నిజామాబాద్లో స్పైస్ బోర్డు ఏర్పాటు చేసి రూ 30కోట్లు కేటాయించినట్లు కేంద్రం బదులిచ్చిందని తెలిపారు. పసుపు ధర పడిపోయినప్పడు.. బీజేపీ ప్రభుత్వం రైతులను ఆదుకోవడానికి సిద్ధంగా ఉన్నప్పుడు.. ముఖ్యమంత్రి కేసీఆర్ కేంద్రానికి లేఖ రాయలేదని విమర్శించారు.
మహారాష్ట్రలో పసుపు విస్తీర్ణం బాగా పెరుగుతోందని.. మహారాష్ట్ర కంటే తెలంగాణలో కూలీల ఖర్చు అధికంగా ఉందని దీనిపై ముఖ్యమంత్రి కేసీఆర్ దృష్టి పెట్టాలన్నారు. తాము కూడా బీఆర్ఎస్ ఇచ్చిన హామీలపై ఫ్లెక్సీలు ఏర్పాటు చేస్తామని.. కేసీఅర్ తట్టుకోలేరని చెప్పారు.
ఫ్లెక్సీలు ప్రత్యక్షం... ధర్మపురి అర్వింద్ 2019 లోక్సభ ఎన్నికల్లో నిజామాబాద్ ఎంపీగా కల్వకుంట కవితపై పోటీ చేశారు. ఈ ఎన్నికల్లో ఎంపీగా తనను గెలిపిస్తే నిజామాబాద్లో పసుపు బోర్డు ఏర్పాటు చేయిస్తానని హామీ ఇచ్చారు. అంతే కాకుండా తన వాగ్దానాన్ని బాండ్ పేపర్పై రాసి మరీ ఓటర్లను ఆకర్షించారు. ఎన్నికలు జరిగి ఏళ్లు గడుస్తున్నాయి. మరికొన్ని నెలల్లో మళ్లీ ఎన్నికలు రానున్నాయి.
అయినా ఇప్పటికి పసుపు బోర్డు ప్రస్తావన లేదు. అయితే గతేడాది పసుపు బోర్డు ఏర్పాటుపై ఇచ్చిన వాగ్దానంను నిలబెట్టుకోవాలని రైతులు ఎంపీ అర్వింద్ను నిలదీశారు. ఇంకెప్పుడు బోర్డు వస్తుందని ప్రశ్నించారు. ఈ క్రమంలో.. పసుపు బోర్డు మించిన ప్రయోజనాలు ఇచ్చే దిశగా కేంద్ర ప్రభుత్వం పయనిస్తోందని అప్పుడు రైతులకు అర్వింద్ సర్దిచెప్పారు.
ఇలా అర్వింద్ మాటిచ్చిన కొద్ది రోజులకే తెలంగాణలో పసుపు బోర్డు ఏర్పాటు చేసే ఉద్దేశం లేదని కేంద్ర వ్యవసాయ శాఖ మంత్రి నరేంద్ర తోమర్ స్పష్టం చేశారు. ఈ క్రమంలోనే నిజామాబాద్ జిల్లా అంతటా తాజాగా పసుపు బోర్డు వ్యవహారంపై ఫ్లెక్సీలు ప్రత్యక్షమయ్యాయి.
ఇవీ చదవండి:
