దేశం మొత్తం ఆసక్తిగా ఎదురుచూసిన నిజామాబాద్ ఎన్నిక ప్రశాంతంగా ముగిసింది. మొత్తం 185మంది అభ్యర్థులు పోటీ చేశారు. 12 ఈవీఎం యూనిట్లను ఉపయోగించి ఎన్నికలు నిర్వహించారు. పలు చోట్ల ఓటింగ్ యంత్రాలు మొరాయించినా... అధికారులు అప్రమత్తమై మరమ్మతులు చేశారు.
నిజామాబాద్, జగిత్యాల జిల్లాల్లోని ఏడు అసెంబ్లీ నియోజకవర్గాల్లో ఉదయం 6 గంటల నుంచి 8 వరకు మాక్ పోలింగ్ నిర్వహించారు. అనంతరం 8 నుంచి సాయంత్రం 6 వరకు ఓటర్లు ఓటు హక్కు వినియోగించుకున్నారు. 1,788 పోలింగ్ కేంద్రాలలో 27 వేల బ్యాలెట్ యూనిట్లను ఉపయోగించారు. ఒక్కో పోలింగ్ బూత్లో 15 మంది చొప్పున 33 వేల మంది సిబ్బంది విధులు నిర్వహించారు.
ఓటేసిన ప్రముఖులు:
తెరాస అభ్యర్థి కవిత... భర్తతో కలిసి బోధన్లోని పొతంగల్లో ఓటు హక్కును వినియోగించుకున్నారు. పోలింగ్కు గంట సమయాన్ని పెంచాలని ఈసీని కోరారు. నిజామాబాద్లోని కాకతీయ కళాశాలలో రాజ్యసభ సభ్యుడు డీ శ్రీనివాస్, భాజపా అభ్యర్థి అర్వింద్ తన భార్యతో కలిసి ఓటు హక్కు వినియోగించుకున్నారు. ఎస్సార్ డిజిటల్ స్కూల్లో కాంగ్రెస్ అభ్యర్థి మధుయాస్కీ ఓటేశారు. రవాణా శాఖ మంత్రి వేముల ప్రశాంత్ రెడ్డి, మాజీ మంత్రి మండవ వెంకటేశ్వర రావు నిజామాబాద్ జిల్లాలో ఓటేశారు. జగిత్యాల జిల్లాలో ఎమ్మెల్యే డాక్టర్‌ సంజయ్‌కుమార్‌, కలెక్టర్‌ శరత్, ఎమ్మెల్సీ జీవన్ రెడ్డి, తెతెదేపా అధ్యక్షుడు ఎల్‌.రమణ ఓటు హక్కు వినియోగించుకున్నారు.
జాగ్రత్తలు తీసుకున్నా తప్పని తిప్పలు
పోలింగ్ కోసం ఎన్ని జాగ్రత్తలు తీసుకున్నా పలు చోట్ల ఓటర్లు ఇబ్బందులు ఎదుర్కొన్నారు. చాలా ప్రాంతాల్లో ఈవీఎంలు మొరాయించాయి. మరికొన్ని చోట్ల కనీస సౌకర్యాలు లేక ఓటర్లు ఇబ్బందులు పడ్డారు. బోధన్ మండలం చెక్కి క్యాంప్లో ఓటర్లు పోలింగ్కు దూరంగా ఉన్నారు. తమ గ్రామాన్ని మున్సిపాలిటీలో విలీనం చేయడాన్ని వ్యతిరేకిస్తూ ఎన్నికలను బహిష్కరించారు. ఎస్సార్ డిజిటల్ పోలింగ్ కేంద్రంలో దివ్యాంగులకు కనీస సౌకర్యాలు ఏర్పాటు చేయలేదు.
ఘర్షణ
హబీబ్‌నగర్‌లో తెరాస, భాజపా కార్యకర్తల మధ్య ఘర్షణ వాతావరణం తలెత్తింది. గులాబీ కార్యకర్తలు ఎక్కువ మంది లోపలికి వస్తున్నారని భాజపా శ్రేణులు ఆగ్రహం వ్యక్తం చేశాయి. భాజపా అభ్యర్థి అర్వింద్ సహా కార్యకర్తలను ఘటనాస్థలం నుంచి పోలీసులు పంపించారు.
రైతు అభ్యర్థులకు మద్దతుగా భారీ ఎత్తున అన్నదాతలు పోలింగ్ ఏజెంట్లుగా వ్యవహరించారు. ఇందులో మహిళలూ ఉండటం విశేషం. ఎన్నికల ఏజెంట్లు, ఓటర్లతో పోలింగ్ కేంద్రాలు సందడిగా మారాయి. భద్రత పరంగా పోలీసులు పటిష్ఠ భద్రత కల్పించారు.
ఇవీ చూడండి: 'ఓటు వేసి ప్రజాస్వామ్యాన్ని కాపాడండి'
