నల్లగొండ జిల్లాలో ఫోర్లైడ్, కరవును నివారించేందుకు... రాష్ట్ర ప్రభుత్వం ప్రతిష్ఠాత్మకంగా చేపట్టిన విద్యాసాగర్ రావు డిండి ఎత్తిపోతల పథకంలో భాగంగా నిర్మిస్తున్న జలాశయం పనులలో అడుగడుగునా ఆటంకాలు ఎదరవుతున్నాయి. శ్రీశైలం జలాశయం నుంచి కృష్ణా నీటిని లిఫ్ట్‌ చేసి డిండి కాల్వల ద్వారా సింగరాజుపల్లి, గొట్టిముక్కల, చింతపల్లి, కిష్టరాయినిపల్లి, చర్లగూడెం జలాశయాలను నింపేందుకు ఈ పథకాన్ని చేపడుతున్నారు. ఈ ఐదు జలాశయాలకు నీటిని పంపుతూ మార్గమధ్యలో ఉన్న కుంటలు, చెరువులు నింపుతారు. 3.11లక్షల ఎకరాలకు సాగునీరు అందించడం ఈ పథకం ఉద్దేశం. ఇప్పటికే 90శాతం పనులు పూర్తయ్యాయి. ఇప్పటికే స్పిల్‌వే నిర్మాణం, గేట్లు, కట్ట ఏర్పాటు, రెయిలింగ్‌ పనులు చివరి దశకు చేరాయి.
మిగిలిన కొంతభాగం రెయిలింగ్‌ పనులు పెండింగ్‌లో ఉండగానే... లింగన్నబావి ముంపు గ్రామస్థులు తమకు పరిహారం అందించాలని గత రెండు నెలలుగా ఆందోళన కార్యక్రమాలు చేపడుతున్నారు. లింగన్నబావి గ్రామంలో 25 ఇళ్లు, పూతలరాంతండాలో 45 నివాసాలు ముంపునకు గురవుతున్నాయి. ఎన్నికల కోడ్‌ అనంతరం పరిహారం అందేలా చర్యలు తీసుకుంటానని సదరు గుత్తేదారు హామీనిచ్చి ఆందోళన విరమింపజేశారు.
ఇటీవల లింగన్నబావి గ్రామస్థులు మరోసారి ఆందోళనకు దిగారు. మల్లన్నసాగర్‌ ప్యాకేజీని ఇక్కడ అమలుపర్చాలని... చింతపల్లి మండలంలో ఇళ్ల స్థలాలు ఇవ్వాలని బాధితులు డిమాండ్‌ చేస్తున్నారు. విషయం తెలుసుకున్న పోలీసులు సంఘటనా స్థలానికి చేరుకుని ఆందోళనకు దిగిన బాధితులను అరెస్టు చేశారు. అనంతరం సొంతపూచీకత్తుపై వదిలిపెట్టారు. గ్రామస్థులు మాత్రం పరిహారం కోరితే అరెస్టు చేస్తారా అని ఆగ్రహం వ్యక్తం చేస్తున్నారు.
