ఉద్యమాల ఖిల్లా నల్గొండపై ఏ పార్టీ జెండా ఎగురునో..?

ఒ‍కప్పుడు కమ్యూనిస్టులకు కంచుకోట... మొన్నటి వరకు హస్తం పార్టీదే హవా... నేడు తెరాసదే జోరు. ఇలా అన్ని పార్టీలు ఆధిపత్యం చెలాయించిన ఉమ్మడి నల్గొండ జిల్లాలో... పార్లమెంటు ఎన్నికల్లో పట్టు నిరూపించుకోవాలని ప్రధాన పార్టీలు ఆరాటపడుతున్నాయి.

రాష్ట్రంలో ఏ ఎన్నికలు జరిగిన మెుదటగా అందరి చూపు ఉద్యమాల ఖిల్లా నల్గొండ జిల్లా వైపే. అన్ని పార్టీల్లో జిల్లా నేతలు ప్రధాన బాధ్యతలు నిర్వహిస్తుండటమే ఇందుకు కారణం. తెరాస అధికారంలోకి వచ్చిన నాటి నుంచి జిల్లాలో హస్తం హవా రోజురోజుకు తగ్గిపోతుంది. పార్లమెంట్​ ఎన్నికల్లోనైనా పట్టు సాధించేందుకు అన్ని పార్టీలు పావులు కదుపుతున్నాయి.

బరిలో అందరూ కొత్తవారే:
కాంగ్రెస్ ఏకంగా పీసీసీ అధ్యక్షుడు ఉత్తమ్​ కుమార్​ రెడ్డిని రంగంలో దింపింది. ఈ పరిస్థితుల్లో అధికార తెరాస అభ్యర్థి ఎంపికలో ఆచితూచి అడుగు వేసింది. సిట్టింగ్ ఎంపీ గుత్తా సుఖేందర్ పోటీకి దిగేందుకు విముఖత చూపినందున అనూహ్యంగా వేమిరెడ్డి నర్సింహారెడ్డిని రంగంలోకి దింపింది. భాజపా నుంచి గార్లపాటి జితేందర్​ బరిలో నిలిచారు. సీపీఎం నుంచి తెలంగాణ సాయుధ పోరాట యోధురాలు మాజీ ఎమ్మెల్యే మల్లు స్వరాజ్యం కోడలు మల్లు లక్ష్మి పోటీలో ఉన్నారు.

అనూహ్యంగా తెరపైకి వేమిరెడ్డి:
ఎలాంటి రాజకీయ నేపథ్యం కానీ, నియోజకవర్గంతో సంబంధాలు పెద్దగా లేని వేమిరెడ్డి నర్సింహారెడ్డి అనూహ్యంగా తెరాస టికెట్ దక్కించుకున్నారు. ఈయనది మునుగోడు మండలం చల్మెడ గ్రామం. చాలా కాలం నుంచి హైదరాబాద్​లో నివాసం ఉంటున్నారు. రాజధాని బ్యాంకు ఛైర్మన్​గా బాధ్యతలు నిర్వహిస్తున్నారు.
గుత్తా సుఖేందర్ రెడ్డికి మూడు సార్లు ఎంపీగా పనిచేసిన అనుభవం, పార్లమెంట్ స్థానం పరిధిలోని ఏడు శాసనసభ నియోజకవర్గాల్లోనూ మంచి పట్టు ఉంది. ఆయనతో పాటు జిల్లాలో అనేక మంది సీనియర్ నేతలను కాదని... కేసీఆర్ వేమిరెడ్డికి అవకాశం ఇవ్వడం వెనుక అసలు రహస్యం ఎవరికి అంతు చిక్కటం లేదు. ఉత్తమ్​కు నర్సింహారెడ్డి ఏ మేరకు పోటీనిస్తారోనని ఆసక్తి నెలకొంది.

గెలుపుపై ఎవరి లెక్కలు వారివే:
నల్గొండ స్థానంపై అధికార తెరాస ఎలాగైనా జెండా ఎగురవేయాలని తీవ్రమైన కసరత్తు చేస్తోంది. నియోజకవర్గ పరిధిలో అధికశాతం ఎమ్మెల్యేలు కలిగి ఉండటం గులాబీకి కలిసి వచ్చే అంశం. కాంగ్రెస్ సైతం పట్టు నిలుపుకునేందుకు ప్రయత్నిస్తోంది. హుజూర్ నగర్, కోదాడ స్థానాల్లో ఉత్తమ్ దంపతులకు మంచి పట్టు ఉండగా... మిర్యాలగూడ, దేవరకొండ, నల్గొండ, నాగార్జునసాగర్ ప్రాంతాల్లో కోమటిరెడ్డి వెంకటరెడ్డి, జానారెడ్డికి బలముంది. అయితే వారు ఎంతవరకు సఖ్యతతో ఉంటారనే దానిపైనే విజయావకాశాలు ఆధారపడి ఉన్నాయి. కార్యకర్తలు ఇదే కోరుకుంటున్నారు.
మొత్తానికి నల్గొండ పోరులో ఓ వైపు సీనియర్ నేతలు, మరోవైపు కొత్త అభ్యర్థుల మధ్య పోటీ రసవత్తరంగా సాగనుంది.

ఇవీ చూడండి:లోక్​సభకు పోటీ చేయాలా? వద్దా? సందిగ్ధంలో తెజస