మునుగోడు ఉపఎన్నిక ప్రచారం మరింత వేడెక్కనుంది. ఇంకా ప్రచారానికి ఏడు రోజుల సమయమే మిగిలి ఉండటంతో ప్రధాన పార్టీలన్నీ ప్రచారంలో వేగం పెంచాయి. వివిధ ప్రాంతాల నుంచి ప్రచారానికి వచ్చిన చాలా మంది ఇన్‌ఛార్జ్‌లు దీపావళి పండుగ నిమిత్తం రెండు రోజుల పాటూ సొంత ప్రాంతాలకు వెళ్లారు.
దీంతో గత రెండు రోజుల పాటూ క్షేత్రాస్థాయిలో అన్ని పార్టీలు అంతంతమాత్రంగానే ప్రచారం నిర్వహించాయి. తాజాగా వారందరూ తిరిగి మునుగోడు నియోజకవర్గానికి చేరుకోవడంతో క్షేత్రస్థాయిలో మళ్లీ సందడి మొదలైంది. చండూరు పురపాలిక పరిధి సమీపంలోని బంగారిగడ్డ వద్ద ఈ నెల 30 సీఎం కేసీఆర్ బహిరంగ సభను నిర్వహించనున్నారు. ప్రచారం ముగిసే గడువుకు రెండు రోజుల ముందు జరిగే ఈ సభ ద్వారా తెరాస తమ ప్రచారాన్ని పతాకస్థాయికి తీసుకెళ్లనుంది.
జేపీ నడ్డా బహిరంగ సభ: ఈ నెల 31 జాతీయ అధ్యక్షుడు జేపీ నడ్డాతో బహిరంగ సభ నిర్వహించాలని భాజపా రాష్ట్ర కమిటీ నిర్ణయించింది. మునుగోడు, చండూరు మధ్యలో సభను నిర్వహించాలని ప్రాథమికంగా నిర్ణయించగా.. సభా వేదికను ఒకట్రెండు రోజుల్లో ఖరారు చేయనున్నారు. ఇప్పటికే రాష్ట్రంలోని ముఖ్య నేతలంతా మునుగోడులోనే మకాం వేసి క్షేత్రస్థాయిలో ప్రచారం నిర్వహిస్తున్నారు.
కేంద్ర మంత్రి కిషన్‌ రెడ్డితో పాటూ పార్టీ రాష్ట్ర అధ్యక్షుడు బండి సంజయ్‌ దీపావళి సందర్భంగానూ నియోజకవర్గంలోనే మకాం వేసి పరిస్థితులను ఎప్పటికప్పుడు పర్యవేక్షిస్తున్నారు. నడ్డా సభ ద్వారా గత నెల రోజుల నుంచి ఉద్ధృతంగా సాగుతున్న ప్రచారాన్ని మరో స్థాయికి తీసుకెళ్తామని, ఆ సభ, పార్టీ విజయోత్సవ సభలాగా భారీ ఎత్తున జనసమీకరణతో నిర్వహించేందుకు పావులు కదుపుతోంది.
మునుగోడులో రెండు రోజుల పాటూ: కాంగ్రెస్‌ పార్టీ సైతం ఎన్నికల ముందు ప్రచారాన్ని ఉద్ధృతం చేస్తోంది. భారత్‌ జోడో యాత్ర సందర్భంగా పార్టీ అగ్రనేత రాహుల్‌ గాంధీతో ఈ నెల 27, 28వ తేదీల్లో మునుగోడు నియోజకవర్గ ముఖ్య నేతలు, నాయకులతో పాటూ పార్టీ అభ్యర్థి పాల్వాయి స్రవంతి పాదయాత్ర చేసేందుకు ప్రణాళికలు సిద్ధం చేస్తున్నారు.
తొలిరోజు నాలుగు మండలాలు, అనంతరం మూడు మండలాల చొప్పున మొత్తం 298 బూత్‌ల నుంచి బూత్‌కు 100 మందికి తక్కువ కాకుండా రాహుల్‌ యాత్రకు రావాలని పార్టీ నాయకులు ఇప్పటికే ప్రచారంలో నాయకులు, కార్యకర్తలను కోరుతున్నారు. అవసరం అయితే నవంబరు 1న శంషాబాద్‌ సమీపంలో సభను నిర్వహిస్తే మునుగోడు నుంచి పార్టీ కార్యకర్తలు, ప్రజలను పెద్ద ఎత్తున తరలించాలని నిర్ణయించారు. అయితే సభపై ఇంకా నిర్ణయం తీసుకోలేదని రెండు రోజుల పాటూ మాత్రం రాహుల్‌ యాత్రలో మునుగోడు ప్రజానీకం పాల్గొని మద్దతునిస్తారని కాంగ్రెస్‌ నేతలు చెబుతున్నారు.
గ్రామాల్లో భద్రత: ప్రచారాన్ని హోరెత్తించేందుకు ప్రధాన పార్టీలు పక్కా ప్రణాళికలతో ముందుకెళ్తుంటే.. నియోజకవర్గ వ్యాప్తంగా పలు మండలాల్లో మాత్రం ఉద్రిక్తతలు చోటు చేసుకుంటున్నాయి. ఓ ప్రధాన పార్టీ అభ్యర్థి ప్రచారం సందర్భంగా రెండు రోజుల కిందట చౌటుప్పల్‌ మండలంలోని నాలుగు గ్రామాల్లో చోటు చేసుకున్న గొడవ ఇరువర్గాలు రాళ్లదాడులు చేసుకునేంత వరకు వెళ్లాయి.
నారాయణపురం, మునుగోడు, నాంపల్లి మండలాల్లోనూ గత నాలుగైదు రోజుల నుంచి గ్రామాల్లో ప్రధాన పార్టీల కార్యకర్తలు, నాయకుల మధ్య ఘర్షణలు పెరిగాయి. పలు గ్రామాల్లో పోలీసులు గొడవలను నియంత్రిస్తున్నా.. అదుపులోకి మాత్రం రావటం లేదు. మరో నాలుగైదు రోజుల్లో సమస్యాత్మక, అత్యంత సమస్యాత్మక గ్రామాల్లో.. గొడవలు మరింత పెరిగే అవకాశం ఉందని నిఘా వర్గాలు సైతం జిల్లా పోలీసు యంత్రాగాన్ని హెచ్చరించినట్లు సమాచారం.
దీంతో ఆయా గ్రామాల్లో.. స్థానిక పోలీసులతో పాటూ కేంద్ర బలగాలను మోహరిస్తున్నారు. ఎన్నికలయ్యేంత వరకు నియోజకవర్గ పరిధిలోని సుమారు 40 గ్రామాల్లో పోలీసు పికెట్‌లను ఏర్పాటు చేసి.. కేంద్ర బలగాలతో పహారా కాయాలని నిఘా వర్గాలు ఇప్పటికే నివేదిక ఇచ్చినట్లు తెలుస్తోంది. ఆయా గ్రామాల్లో భద్రతను కట్టుదిట్టం చేయడంతో పాటూ.. నేరాల నియంత్రణకు పలువురు అనుమానితులను, నేర చరిత్ర ఉన్నవారిని ముందుగానే పోలీసులు అదుపులోకి తీసుకుంటున్నారు.
ఇవీ చదవండి:
