పల్లెల్ని అభివృద్ధి బాట పట్టించడమే ప్రభుత్వ ధ్యేయమని పంచాయతీరాజ్ శాఖ మంత్రి ఎర్రబెల్లి దయాకర్ రావు అన్నారు. గ్రామాల పురోభివృద్ధికి ప్రతి ఒక్కరూ స్వచ్ఛందంగా ముందుకు రావాలని కోరారు. 30 రోజుల ప్రణాళికలో భాగంగా... విద్యుత్‌ శాఖ మంత్రి జగదీశ్ రెడ్డితో కలిసి సూర్యాపేట, నల్గొండ జిల్లాల్లో పర్యటించారు. సూర్యాపేట జిల్లా మేళ్లచెరువులో జరిగిన సమావేశంలో మంత్రి జగదీశ్ రెడ్డి, ఎంపీ ఉత్తమ్ కుమార్ రెడ్డి ప్రశ్నలకు బదులివ్వడం చర్చానీయాంశంగా మారింది.
చెత్త వేసిన వారికి జరిమానాలు విధించడం, పారిశుద్ధ్య నిర్వహణపై అవగాహన కార్యక్రమాలు నిర్వహించడం ద్వారానే... గ్రామాల్లో అభివృద్ధి సాధ్యమవుతుందని మంత్రి ఎర్రబెల్లి దయాకర్ రావు అభిప్రాయపడ్డారు. పల్లెలకు విరాళాలిచ్చే వారి పేర్లు, ఫొటోలను పంచాయతీ కార్యాలయాల్లో పెడితే... మిగతా వారికి ఆదర్శంగా ఉంటుందన్నారు. మేళ్లచెరువు సమావేశంలో ఎంపీ ఉత్తమ్ కుమార్ రెడ్డి మాట్లాడుతూ... రైతుబంధు సాయం అందక పోవడం, ఎరువుల కొరతతో రైతులు ఇబ్బందులకు గురవుతున్నారని ఆవేదన వ్యక్తం చేశారు. అధికారిక కార్యక్రమాల్లో ప్రొటోకాల్ పాటించడం లేదని, ముందుగానే సమాచారం ఇవ్వాలని కోరగా... ఇలాంటివి మరోసారి పునరావృతం కాకుండా జాగ్రత్తలు తీసుకుంటామని మంత్రి జగదీశ్ రెడ్డి బదులిచ్చారు.
ఎమ్మెల్యే సోదరుడి దాతృత్వం...
మేళ్లచెరువు పర్యటన అనంతరం మంత్రులు నల్గొండ జిల్లా చిట్యాల మండలం ఉరుమడ్ల గ్రామసభకు హాజరయ్యారు. ఎమ్మెల్సీ గుత్తా సుఖేందర్ రెడ్డి, నల్గొండ శాసనసభ్యుడు కంచర్ల భూపాల్ రెడ్డి స్వగ్రామమైన ఉరుమడ్లలో... స్థానికులతో మంత్రులు ముచ్చటించారు. భూపాల్ రెడ్డి సోదరుడు కృష్ణారెడ్డి కోటి రూపాయల విరాళం ప్రకటించాడు. అక్కడికక్కడే మంత్రులకు చెక్కు అందజేసి తన దాతృత్వం చాటుకున్నాడు. సుఖేందర్ రెడ్డి సోదరుడు జితేందర్ రెడ్డి 5 లక్షల విరాళం ఇచ్చారు.
ప్రతి ఒక్కరూ మొక్కలు నాటాలన్న ఎర్రబెల్లి... చెట్లను నరికితే నేరుగా జైలుకు పంపించే కొత్త చట్టం వచ్చిందని గ్రామస్థులను హెచ్చరించారు. చెత్త పడేస్తే ఐదు వందల రూపాయలు, రెండోసారి అదే చేస్తే వెయ్యి రూపాయలు జరిమానా విధించుకుంటామంటూ... గ్రామస్థులతో తీర్మానం చేయించారు.
ఇదీ చూడండి: ఆంధ్రప్రదేశ్కు అతిపెద్ద... తెలంగాణకు అతిచిన్న!
