శ్రీశైలం జలాశయానికి వరద ప్రవాహం కొనసాగుతోంది. నీటి ఉద్ధృతి ఎక్కువగా ఉండటంతో అధికారులు ఇవాళ 4 గేట్లను ఎత్తారు. స్పిల్ వే ద్వారా 1.11 లక్షల క్యూసెక్కుల నీటిని విడుదల చేశారు. ఎగువ నుంచి శ్రీశైలానికి 1.71 లక్షల క్యూసెక్కుల నీరు ప్రవహిస్తోంది. శ్రీశైలం జలాశయం ప్రస్తుత నీటిమట్టం 884.80 అడుగులు ఉండగా.. ప్రస్తుత నీటినిల్వ 214.84 టీఎంసీలుగా ఉంది. కుడి, ఎడమ జల విద్యుత్ కేంద్రాల్లో విద్యుదుత్పత్తి చేస్తున్నారు. విద్యుదుత్పత్తి చేసి 64,102 క్యూసెక్కుల నీటిని సాగర్‌కు విడుదల చేస్తున్నారు.
సాగర్ 10 గేట్లు ఎత్తివేత
నాగార్జునసాగర్ జలాశయానికి(nagarjuna sagar project) భారీగా వరద వచ్చి చేరుతోంది. లక్షా 90 వేల 645 క్యూసెక్కుల ఇన్ఫ్లో ఉండగా... 10 గేట్లు, కాల్వల ద్వారా లక్షా 81 వేల 423 క్యూసెక్కుల్ని విడుదల చేస్తున్నారు. గరిష్ఠ నీటిమట్టానికి తోడు పూర్తి సామర్థ్యం మేరకు నిల్వ చేస్తున్నారు. 590 అడుగుల గరిష్ఠ నీటి నిల్వకు గాను 590 అడుగుల మేర... 312.04 టీఎంసీల సామర్థ్యానికి గాను 312.04 టీఎంసీల మేర ప్రస్తుతం నిల్వ ఉంది. కుడి కాల్వకు 9 వేల 160... ఎడమ కాల్వకు 8 వేల 718.. ఎస్సెల్బీసీ ఏఎమ్మార్పీకి 2 వేల 4 వందలు... ఎల్ఎల్సీకి 4 వందల క్యూసెక్కులు వదులుతున్నారు.
పులిచింతలకు భారీ ప్రవాహం
సాగర్ నుంచి విడుదలవుతున్న నీటితో సూర్యాపేట జిల్లాలోని పులిచింతల ప్రాజెక్టు(pulichintala project)కు లక్షా 68 వేల 77 క్యూసెక్కులు వచ్చి చేరుతోంది. అక్కణ్నుంచి 9 గేట్ల ద్వారా లక్షా 80 వేల 299 క్యూసెక్కులు కిందకు పంపుతున్నారు. 45.77 టీఎంసీల పూర్తి సామర్థ్యానికి గాను ప్రాజెక్టులో 33.27 టీఎంసీల నిల్వ ఉంది. అటు నల్గొండ జిల్లాలోని మూసీ ప్రాజెక్టు(musi project)కు 14 వేల 934 క్యూసెక్కుల నీరు వస్తుండగా... మూడు గేట్లను 5 అడుగుల మేర ఎత్తి 9 వేల 8 వందల క్యూస్కెక్కుల్ని దిగువకు వదులుతున్నారు. 4.46 టీఎంసీల గరిష్ఠ సామర్థ్యానికి గాను మూసీ జలాశయంలో.. 3.74 టీఎంసీల నిల్వ ఉంది.
ఇదీ చదవండి: మల్లన్నసాగర్‌ను విహంగ వీక్షణం చేసిన సీఎం కేసీఆర్‌
