దక్షిణ తెలంగాణను ఎడారిగా మారుస్తున్నారని సీపీఐ రాష్ట్ర కార్యదర్శి చాడ వెంకటరెడ్డి విమర్శించారు. నల్గొండ జిల్లాలోని ఎస్ఎల్బీసీ, డిండి, బ్రాహ్మణ వెల్లంల ప్రాజెక్టులను త్వరగా పూర్తి చేయాలని డిమాండ్ చేశారు. పోతిరెడ్డిపాడు ద్వారా నీటి తరలింపు జీవో 203 వెంటనే ఉపసంహరించుకోవాలని డిమాండ్ చేశారు. నల్గొండ జిల్లా కేంద్రంలోని పార్టీ కార్యాలయంలో నిర్వహించిన జిల్లా సదస్సులో ఆయన ముఖ్య అతిథిగా పాల్గొన్నారు.
ప్రత్యేక తెలంగాణ కొట్లాడి తెచ్చుకుంది మా నీళ్లు, మా నిధుల కోసమని వెంకటరెడ్డి పేర్కొన్నారు. రాష్ట్రం ఏర్పడి ఆరేళ్లు గడిచినా.. ఎస్ఎల్బీసీ, డిండి మొదలైన ప్రాజెక్టులను సీఎం పట్టించుకోవడం లేదని విమర్శించారు. జగన్ తమ వాటాకు వచ్చే నీళ్లు మాత్రమే తీసుకెళుతున్నామని చెబుతుంటే.. కేసీఆర్ మాత్రం ఇప్పటి వరకు దీనిపై నోరు విప్పడం లేదని ఎద్దేవా చేశారు.
నల్గొండ, రంగారెడ్డి, మహబూబ్నగర్, ఖమ్మం మొదలైన జిల్లాలను ఎడారిగా మార్చడం ఖాయమని.. తెలంగాణ ప్రజలు మళ్లీ ఉద్యమం చేయక తప్పదని ఆయన హెచ్చరించారు.
సదస్సులో సీపీఐ సహాయ కార్యదర్శి పల్లా వెంకట్రెడ్డి, రిటైర్ట్ తెలంగాణ ఇంజినీర్స్ ఫోరం కన్వీనర్ డి.లక్ష్మీనారాయణ తదితరులు పాల్గొన్నారు.
