Young Man Committed Suicide in Nalgonda: తనపై ఓ యువతి ఫిర్యాదు చేయడం, పోలీసులు తీసుకెళ్లి విచారణ చేయడంతో ఆందోళనకు గురైన యువకుడు ఆత్మహత్యకు పాల్పడ్డాడు. దీంతో బాధితులు అతని మృతదేహంతో యువతి ఇంటి వద్ద ఆందోళనకు దిగారు. అడ్డుకోబోయిన పోలీసులపైనా వారు తిరగబడ్డారు. ఈ ఘటన నల్గొండ జిల్లా చండూరు మండలం తాస్కానిగూడెంలో శనివారం చోటు చేసుకుంది. బాధితులు, స్థానికులు తెలిపిన ప్రకారం.. తన కుమార్తె(17)ను అబ్బనబోయిన శివ (26) ప్రేమ పేరిట వేధిస్తున్నాడంటూ తాస్కానిగూడేనికి చెందిన ఓ మహిళ ఈ నెల 7వ తేదీన నల్గొండ జిల్లాలో షీ టీమ్‌కు ఫిర్యాదు చేశారు.
Young Man Commit Suicide: ఆమె ఇచ్చిన సమాచారంతో విచారణ కోసం.. శివను ఈ నెల 10న పోలీసులు అదుపులోకి తీసుకున్నారు. అతనికి షీ టీమ్ సీఐ రాజశేఖర్‌ కౌన్సిలింగ్‌ చేసి, అదే రోజు సాయంత్రానికి వదిలేశారు. దీంతో మనస్తాపానకి గురైన శివ ఈ నెల 11న ఇంట్లో పురుగు మందు తాగాడు. ఇది గమనించిన అతని కుటుంబసభ్యులు హైదరాబాద్‌లోని ఓ ఆసుపత్రికి తరలించారు. ఆసుపత్రిలో చికిత్స పొందుతూనే శుక్రవారం మధ్యాహ్నం అతను మృతి చెందాడు. పోస్ట్‌మార్టం అనంతరం.. మృతదేహాన్ని శనివారం సాయంత్రం పోలీసు బందోబస్తు మధ్య అంబులెన్స్‌లో అతని స్వగ్రామానికి తీసుకొచ్చారు.
పోలీసులపై కారం చల్లడంతో పరిస్థితి ఉద్రిక్తం: అయితే మృతదేహాన్ని యువతి ఇంటి ఆవరణలో ఉంచి ఆందోళన చేపట్టేందుకు కుటుంబ సభ్యులు, బంధువులు సిద్ధమయ్యారు. పోలీసులు అడ్డుకునేందుకు ప్రయత్నం చేయగా.. ఇరువర్గాల మధ్య వాగ్వాదం జరిగింది. ఇదే సమయంలో కొందరు పోలీసులపై కారం చల్లడంతో పరిస్థితులు ఉద్రిక్తంగా మారాయి. ఈ క్రమంలో వారు శివ మృతదేహాన్ని యువతి ఇంటి ఎదుట ఉంచి ఆందోళనకు దిగారు. కౌన్సిలింగ్‌ పేరుతో పిలిపించిన సీఐ రాజశేఖర్‌ విచక్షణా రహితంగా కరెంట్‌ షాక్‌ ఇచ్చి చితకబాదారని మృతుని కుటుంబసభ్యులు ఆరోపించారు.
సీఐ కొట్టడంతోనే మనస్తాపానికి గురైన శివ ఆత్మహత్యకు పాల్పడ్డారని బాధితులు ఆరోపించారు. వారికి న్యాయం జరిగే వరకు శివ మృతదేహాన్ని అక్కడి నుంచి తీసుకెళ్లే ప్రసక్తే లేదని భీష్మించుకు కూర్చున్నారు. దీనిపై షీ టీమ్ సీఐ రాజశేఖర్‌ను వివరణ కోరగా.. పోలీసు నియామక పరీక్షలు రాశానని, కేసు పెట్టవద్దని ఫిర్యాదుదారులను శివ అభ్యర్థించగా వారు తిరస్కరించారని వివరించారు. దాంతోనే శివ మనస్తాపానికి గురై ఉంటాడని, దీనికి తాము అతన్ని కొట్టామనడం సరికాదన్నారు.
మా కుమారుడిపై ఆ అమ్మాయి తల్లిదండ్రులు కేసు పెట్టి, స్టేషన్కు తీసుకువెళ్లి కొట్టారు. మళ్లీ చండూరు పోలీస్ స్టేషన్కు పంపించి కొట్టి, బెదిరించారు. కేసు అవుతుంది.. నీ జీవితం మొత్తం పోతుందని బెదిరించి మనస్తాపానికి గురయ్యేలా చేశారు. నా బిడ్డ మరణానికి కారణం వాళ్లే. -మృతుడి తండ్రి
ఇవీ చదవండి:
