అది నాగర్కర్నూలు జిల్లాలోని ఓ మారుమూల గ్రామం. అక్కడ ప్రభుత్వ ప్రాథమిక పాఠశాలకు ఓ ప్రత్యేకత ఉంది. ఈ బడిలో చదివే విద్యార్థులు ప్రతిఏటా గురుకుల పాఠశాలలో సీట్లు సాధిస్తూ ప్రైవేట్ పాఠశాల విద్యార్థులతో పోటీ పడుతున్నారు. దీనివెనుక అంకితభావంతో పనిచేసే ప్రధానోపాధ్యాయుడు ఉన్నారు. అంతకుమించి వినూత్నంగా పాఠాలు బోధించే ఉపాధ్యాయులు ఉన్నారు. చింతలపల్లిలోని ప్రభుత్వ పాఠశాల గురించి తెలుసుకున్న గ్రామ పెద్దలు ప్రజాప్రతినిధులు మరింత నాణ్యమైన విద్య కోసం సొంతంగా విద్యా వాలంటరీ నియమించారు.
సాధారణ బడి.. రైలుబడిగా మారిందిలా..
చింతలపల్లి ప్రభుత్వ పాఠశాల గురించి తెలుసుకున్న ఎమ్మెల్యే బీరం హర్షవర్ధన్ రెడ్డి.. ఉపాధ్యాయుల కృషిని అభినందించారు. పాఠశాల అభివృద్ధి, విద్యార్థులకు మెరుగైన వసతులు కల్పించేందుకు తన వంతుగా రూ. 5 లక్షల విరాళం అందించారు. ఈ నగదుతో పాఠశాల యాజమాన్యం విద్యార్థులను ఆకర్షించే విధంగా.. వారి బడిన ఓ రైలు బండిలా తీర్చిదిద్దారు.
గురుకులాలకు 98 మంది
ఆహ్లాదకరమైన వాతావరణంలో విద్యార్థులు చదువుకునేందుకు వీలుగా పాఠశాలను తీర్చిదిద్దారు. 120 మంది విద్యార్థులు ఇక్కడ విద్యనభ్యసిస్తున్నారు. ఇప్పటివరకు ఈ బడి నుంచి దాదాపు 98 మంది గురుకులాలకు ఎంపికయ్యారు. 2012-13లో 16 మందికి అవకాశం లభించింది. ఏటా గురుకులాలకు ఎంపికవుతున్న తీరు చూసి, ఈ పాఠశాలలో విద్యనభ్యసించేందుకు హైదరాబాద్ విద్యార్థులు మొగ్గుచూపుతున్నారు.
ఆటలూ ముఖ్యమే
కేవలం చదువే కాకుండా.. విద్యార్థుల్లో సృజనాత్మకతను పెంచేందుకు క్రీడలు, సాంస్కృతి కార్యక్రమాలు నిర్వహిస్తూ వారిలో ఉత్సాహాన్ని నింపుతున్నారు ఇక్కడి ఉపాధ్యాయులు. క్విజ్లు, ఆటలు, పాటల పోటీలు నిర్వహిస్తూ.. వారిని ఉత్సాహపరిచేందుకు బహుమతులు అందజేస్తున్నారు. చింతలపల్లి ప్రాథమిక పాఠశాలను జిల్లాలోనే ఆదర్శగా బడిగా తీర్చిదిద్దడమే లక్ష్యంగా ఇక్కడి టీచర్లు పనిచేస్తున్నారు.
- ఇదీ చూడండి : ఇలా ఉంటే బడి.. అస్సలు మానాలనిపించదు మరి..
