రోజురోజుకు పెరిగిపోతున్న పిల్లల అపహరణ... ఇళ్లలోకి చొరబడి చోరీలు... అనుకోకుండా ఇంట్లో విద్యుత్ ఉపకరణాలు ఉపయోగించి వాటిని మరచిపోవడం... ఇలాంటి ఎన్నో సమస్యలు ఆ యువకుడిని ఆలోచింపజేశాయి. ఆ ఆలోచనల్లోంచి పరిష్కారాలుగా నూతన సాంకేతికతతో పరికరాల సృష్టికి కారణమయ్యాయి. అన్ని వర్గాల ప్రజలకు ఉపయోగపడేలా అందుబాటు ధరల్లో తనదైన శైలిలో పరికరాలు రూపొందిస్తున్నాడు నాగర్ కర్నూల్ జిల్లా కల్వకుర్తి పురపాలక పరిధిలోని ఎన్జీవోస్ కాలనీకి చెందిన శ్రీ రామదాసు ధర్మసాయి.
ట్రాకింగ్ పరికరం...
చిన్నపిల్లల అపహరణ రోజురోజుకు పెరిగిపోతున్న తరుణంలో ట్రాకింగ్ పరికరం సాయంతో కిడ్నాప్కు గురైన వారిని సులభంగా కనిపెట్టవచ్చని చెబుతున్నాడు. చిన్నారులు పరిధిని దాటి బయటకు వెళ్లినప్పుడు తల్లిదండ్రులను అప్రమత్తం చేసేలా ప్యాకెట్ జీపీఎస్ ట్రాకర్ను రూపొందించాడు. దానిని చిన్నారుల జేబు, బ్యాగుల్లో పెట్టుకోవచ్చు. గూగుల్ మ్యాప్ ద్వారా పరిధిని నిర్ణయించి నమోదు చేసుకోవాలి.
రూ.700 మాత్రమే...
నిర్ణయించిన పరిధి దాటి బయటకు వెళ్లగానే అందులో ముందుగా నమోదు చేసిన కుటుంబ సభ్యుల చరవాణి నంబర్కు సందేశం వెళ్తుంది. ప్రత్యేకంగా ఏర్పాటు చేసిన బటన్ను నొక్కితే కుటుంబ సభ్యులకు ఎక్కడ ఉన్నామో తెలుస్తుంది. ఈ పరికరం చరవాణి సిగ్నల్స్ లభించని ప్రాంతాల్లో కూడా పనిచేసేలా రూపొందించాడు. దీని తయారీకి కేవలం రూ.700 మాత్రమే అయిందని చెబుతున్నాడు.
మరిన్ని ఆవిష్కరణలు...
ఇటీవలే బీటెక్ పూర్తి చేసిన ధర్మసాయి చిన్నప్పటి నుంచి కొత్త పరికరాలను తయారు చేసేందుకు ఆసక్తి చూపించేవాడు. ధర్మసాయి గతంలోనే కరోనా క్యాప్, డోర్ లాక్ అలర్ట్, సామాజిక దూరం పాటించే యంత్రాన్ని, గూగుల్ సాయంతో ఇంట్లోని ఫ్యాన్, విద్యుద్దీపాలను ఆన్ చేయడం ఆఫ్ చేయడం వంటి పరికరం, హోటల్ బిల్డింగ్ మిషన్, హోమ్ అలారం, ఆర్ఎఫ్ఐడీ జీపీఎస్ ట్రాకర్ వంటి పరికరాలను రూపొందించాడు. ప్రభుత్వపరంగా ప్రోత్సహిస్తే మరిన్ని నూతన ఆవిష్కరణలు చేసేందుకు సిద్ధమని తెలిపాడు.
ఇదీ చూడండి: 'నీ దగ్గర ఛాయ్ బావుంటుందంటా... నాకు ఇవ్వూ'
