ములుగు మారుమూలన అటవీ ప్రాంతం ఎక్కువగా ఉన్న చిన్న జిల్లా. అయినా, కరోనాపై పోరాటంలో ముందుంటోంది. కలెక్టర్‌ కృష్ణ ఆదిత్య చొరవతో అధికారులు 6 లక్షల మాస్కులు తయారు చేయించాలని నిర్ణయించారు. జిల్లాలోని 200లకు పైగా స్వయం సహాయక సంఘాల ద్వారా నాణ్యమైన 6 లక్షల మాస్కులు తయారీకి అధికారులు ఏర్పాట్లు చేశారు. ఇప్పటికే లక్ష మాస్కుల తయారీ పూర్తి చేశారు. వీటిని సోమవారం పంపిణీ చేస్తామని కలెక్టర్‌ వెల్లడించారు.
జిల్లాలో 3.05 లక్షల మంది జనాభా ఉండగా ప్రతి వ్యక్తికి రెండు చొప్పున 6 లక్షల మాస్కులు తయారు చేయిస్తున్నారు. మాస్కుల తయారీకి 5 వేల మీటర్ల సిరిసిల్ల చేనేత వస్త్రాన్ని తీసుకొచ్చారు. ఒక మాస్కు కుట్టినందుకు రూ.3 చెల్లిస్తారు. వస్త్రానికి రూ.6 ఖర్చవుతోంది. వీటిని ఉచితంగా పంపిణీ చేయాలా లేదా నామమాత్రపు రుసుముతో విక్రయించాలా అనేది అధికారులు నిర్ణయించాల్సి ఉంది. విద్యార్థులకు మాత్రం ఉచితంగా పంపిణీ చేస్తామని కలెక్టర్‌ స్పష్టం చేశారు.
ఇదీ చూడండి : వెళ్లలేరు.. ఉండలేరు..
