విద్యార్థినిలు అస్వస్థతకు గురైనా... మారని పంథా

మెదక్​ జిల్లాలోని మహాత్మా జ్యోతిబాపూలే గురుకుల బాలికల పాఠశాలలో కలుషిత ఆహారం తిని విద్యార్థినిలు అస్వస్థతకు గురైన సంగతి తెలిసిందే. మూడు రోజుల సెలవుల తర్వాత తమ పిల్లలను తీసుకువచ్చిన తల్లిదండ్రులు పాఠశాలలోని వంటగదిని పరిశీలించారు. ఇంత జరిగినా.. పురుగులు పట్టిన సామగ్రిని వంటకు ఉపయోగిస్తుండటం చూసి  ఆందోళనకు దిగారు.

మూడ్రోజుల క్రితం కలుషిత ఆహారం తిని మెదక్ జిల్లాలోని మహాత్మ జ్యోతిబాపూలే గురుకుల బాలికల పాఠశాల విద్యార్థినిలు అస్వస్థతకు గురయ్యారు. ఈ సంఘటనతో జిల్లా కలెక్టర్ ధర్మారెడ్డి మూడు రోజులు పాఠశాలకు సెలవు ఇవ్వాలని ఆదేశించారు. ఈరోజు పునఃప్రారంభమైన పాఠశాలకు తల్లిదండ్రులు తమ పిల్లల్ని తీసుకొని వచ్చారు.

మారని పంథా :

తల్లిదండ్రులు వంట గది, స్టోర్ రూమ్​లను పరిశీలించారు. రవ్వ, ఆవాలు, జీలకర్ర మొత్తం పురుగు పట్టి ఉండటం చూసి ఆగ్రహం చెందారు. తమ పిల్లలకు ఇటువంటి ఆహారం అందిస్తున్నారని ఆవేదన వ్యక్తం చేశారు.

నిర్లక్ష్య ధోరణి

కుళ్లిపోయిన కూరగాయలతో వారి ముందే వంట చేయడానికి ప్రయత్నించగా బాలికల తల్లిదండ్రులు అడ్డుకున్నారు. పాఠశాల ప్రిన్సిపల్​తో మాట్లాడితే.. ఉంటే ఉంచండి లేకపోతే తీసుకెళ్లండి అని నిర్లక్ష్యంగా మాట్లాడుతున్నారని ఆవేదన చెందారు. పరీక్షలున్నాయని తమ పిల్లలను పాఠశాలకు తీసుకొస్తే నిర్లక్ష్యంగా వ్యవహరిస్తున్నారని ఆందోళనకు దిగారు.

ఇవీ చూడండి:దివ్యాంగులకు ఓటరు అవగాహన కార్యక్రమం