కరోనా వేళ... ఉపాధి’కి లక్ష మంది..!

మెదక్​ జిల్లాలో ఉపాధి హామీ పనులు ఊపందుకున్నాయి. రోజురోజుకూ కూలీల హాజరు పెరుగుతోంది. గతంలో ఎన్నడూ లేని విధంగా లక్ష మంది కూలీలు ఒకేరోజు పనుల్లో పాల్గొనడం విశేషం.

కరోనా నేపథ్యంలో ప్రభుత్వం లాక్‌డౌన్‌ విధించడం వల్ల వలస వెళ్లిన వారు తిరిగి స్వస్థలాలకు చేరుకుంటున్నారు. వారు జీవనోపాధి కోల్పోవడంతో.... జాతీయ గ్రామీణ ఉపాధి హామీ పథకం వరమైంది. మెదక్​ జిల్లాలో 469 గ్రామపంచాయతీలు ఉన్నాయి. వాటిల్లో 12,043 శ్రమశక్తి సంఘాలు. 1,67,426 కుటుంబాలకు జాబ్‌కార్డులు జారీ చేశారు. ఈమేరకు 3.79 లక్షల మంది కూలీలు ఉన్నారు. ఉపాధి హామీ ద్వారా గ్రామాల్లో వివిధ పనులు చేపడుతున్నారు. గత నెల 1 నుంచి క్రమంగా కూలీల సంఖ్య పెరుగుతూ వస్తోంది. ఏప్రిల్‌ 1న 4,200 మంది కూలీలు హాజరవగా, ఈ నెల 5న 1,01,500 మంది కూలీలు హాజరవడం గమనార్హం. గతేడాది మే 5న 50 వేల మంది కూలీలు పనిచేశారు.

పాపన్నపేట మండలంలో అత్యధికంగా...

మంగళవారం జిల్లాలోని పాపన్నపేట మండలంలో అత్యధికంగా 7,254 మంది, అత్యల్పంగా మనోహరాబాద్‌లో 2,128 మంది పనులకు వచ్చారు. పెద్దశంకరంపేటలో 7,153, హవేలిఘనపూర్‌, శివ్వంపేట, చిన్నశంకరంపేట, టేక్మాల్‌ మండలాల్లో 6 వేల మందికి పైగా పాల్గొంటున్నారు. మే నెలకు సంబంధించి కూలీలకు 27.42 లక్షల పనిదినాలను కల్పించాల్సి ఉండగా, ఇప్పటి వరకు 7 లక్షలు కల్పించారు.

లాక్‌డౌన్‌ వేళ... కూలి పెంపు...

కేంద్రం కూలి రూ.237కు పెంచడం, కరోనా వైరస్‌ వ్యాప్తి నేపథ్యంలో లాక్‌డౌన్‌ విధించడం వల్ల చాలా మంది ఉపాధి పనులకు మొగ్గు చూపుతుండటంతో కూలీల సంఖ్య పెరగడానికి కారణమని అధికారులు చెబుతున్నారు. ప్రస్తుతం సగటు కూలి రూ.152 అందుతోంది. మట్టిరోడ్ల నిర్మాణం, సరిహద్దు కందకాలు, చెరువుల పూడికతీత, సేద్యపు నీటి కుంటల తవ్వకం తదితర పనులు చేస్తున్నారు.

ఇప్పటికే జిల్లా పాలనాధికారి ధర్మారెడ్డి గ్రామాల్లో పని అడిగిన ప్రతి ఒక్కరికీ ఉపాధి కల్పించాలని పలు సమీక్ష సమావేశాల్లో సూచించారు. ఈనెల 29 వరకు లాక్‌డౌన్‌ పొడిగించినందున రాబోయే రోజులలో కూలీల సంఖ్య మరింత పెరగనుందని డీఆర్డీవో శ్రీనివాస్‌ తెలిపారు. జాబ్‌ కార్డులేని వారికి తక్షణమే అందజేస్తున్నామని, పని అడిగిన వారందరికీ ఉపాధి కల్పిస్తున్నామన్నారు.