విశేష సేవలందిస్తున్న వారికి ఉమ్మడి మెదక్​ వందనాలు

కరోనాను కట్టడి చేసేందుకు ప్రధాని మోదీ, రాష్ట్ర ముఖ్యమంత్రి కేసీఆర్​ ఇచ్చిన జనతా కర్ఫ్యూ పిలుపునకు ఉమ్మడి మెదక్​​ జిల్లాలో అపూర్వ స్పందన లభించింది. మెదక్​, సంగారెడ్డి, సిద్దిపేట జిల్లాల ప్రజలంతా స్వచ్ఛందంగా కర్ఫ్యూలో పాల్గొని... స్వీయ నిర్బంధంలో ఉన్నారు.

ప్రధాని మోదీ, తెలంగాణ సీఎం కేసీఆర్​ పిలుపునిచ్చిన జనతా కర్ఫ్యూకు ఉమ్మడి మెదక్​​ జిల్లా ప్రజలంతా సంఘీభావం ప్రకటించారు. ఇళ్లలోనే స్వీయ నిర్బంధంలో ఉండిపోయారు. కొవిడ్​-19​ వ్యాప్తి నివారణ కోసం అహర్నిశలు కృషిచేస్తున్న వారందరి సేవలను కొనియాడుతూ... మెదక్​, సంగారెడ్డి, సిద్దిపేట​ జిల్లాల ప్రజలు కరతాళ ధ్వనులతో మద్దతు పలికారు.

ప్రపంచ దేశాలను గడగడలాడిస్తున్న కరోనా మహమ్మారిని ఎదుర్కొనేందుకు... ప్రాణాలుపణంగా పెట్టి పనిచేస్తున్న వైద్య, పోలీస్, ఫైర్ సిబ్బందికి రాష్ట్ర ఆర్థికమంత్రి హరీశ్​రావు... హైదరాబాద్​లోని తన నివాసంలో కుటుంబ సమేతంగా చప్పట్లు కొట్టి ధన్యవాదాలు తెలిపారు.

వృత్తి ధర్మాన్ని చాటుతూ కరోనా వ్యాప్తి నివారణకు కృషి చేస్తోన్న వారందరికి సిద్దిపేట జిల్లా జడ్పీ ఛైర్​పర్సన్ రోజాశర్మ, కలెక్టర్ వెంకట్రామిరెడ్డి, సీపీ జోయల్ డేవిస్, మున్సిపల్ ఛైర్మన్ కడవేర్గు రాజనర్సు, అడిషనల్ కలెక్టర్ పద్మాకర్, ఇతర అధికారులు చప్పట్లతో మద్దతు ప్రకటించారు. జనతా కర్ఫ్యూ నేపథ్యంలో ఉమ్మడి జిల్లా వ్యాప్తంగా రహదారులు నిర్మానుష్యంగా కనిపించాయి.

ఇదీ చూడండి : రైతు బజార్లు కిటకిట... ధరలు భగభగ