నిజాం పాలన నుంచి తెలంగాణ వచ్చేంతవరకు రైతులు.. ప్రభుత్వానికి వన్నులు కట్టారని.. మంత్రి హరీశ్రావు అన్నారు. ఆ చరిత్రను తిరగరాసి సీఎం కేసీఆర్.. రైతులకు పెట్టబడి సాయం కింద రూ.10 వేలు ఇచ్చారన్నారు.
మెదక్ పట్టణంలోని జీకేఆర్ గార్డెన్లో మంత్రి హరీశ్రావు, ఎమ్మెల్యే పద్మాదేవేందర్రెడ్డి, ఎమ్మెల్సీ ఫారూఖ్ హుస్సేన్ ఆధ్వర్యంలో ఐదుగురు కాంగ్రెస్ కౌన్సిలర్లు తెరాసలో చేరారు. వారందరికి హరీశ్రావు.. గులాబీ కండువా కప్పి పార్టీలోకి ఆహ్వానించారు.
వారిది చీకటి ఒప్పందం..
కాంగ్రెస్ అగ్రనేత రాహుల్ గాంధీ భాజపాపై పోరాడమంటే.. రాష్ట్రంలోని కాంగ్రెస్ నేతలు మాత్రం తెరాసపై ఆరోపణలు చేస్తున్నారని మంత్రి హరీశ్ మండిపడ్డారు. దుబ్బాక ఉపఎన్నికల్లో కాంగ్రెస్, భాజపాలు చీకటి ఒప్పందం చేసుకున్నాయని హరీశ్రావు ఆరోపించారు. అందువల్లనే ఇప్పటి వరకు కాంగ్రెస్ పార్టీ కనీసం కార్యకర్తల సమావేశం కూడా పెట్టలేదన్నారు. తెరాసను ఎదుర్కొలేక ఇరుపార్టీలు కుమ్మక్కయ్యాయని విమర్శించారు. వ్యవసాయ బిల్లులపై భాజపా విమర్శించడం మాని.. తెరాసను తిడుతున్నారని.. కాంగ్రెస్ తీరును ప్రజలు నవ్వుకుంటున్నారని హరీశ్ ఎద్దేవా చేశారు.
మెదక్కు త్వరలో రైలు సదుపాయం అందుబాటులోకి రానుందని హరీశ్ అన్నారు. రింగ్ రోడ్ సహా పర్యటక ప్రాజెక్టులు, పరిశ్రమల ఏర్పాటుకు చర్యలు తీసుకుంటామని మంత్రి హామీ ఇచ్చారు. ఎన్నికల కోడ్ ముగిసిన తర్వాత మెదక్లో నిర్మించిన రెండు పడక గదుల ఇళ్లను పంపిణీ చేస్తామన్నారు. దేశంలో ఎక్కడా లేనన్ని సంక్షేమ పథకాలు తెలంగాణలో అమలుచేస్తున్నట్లు మెదక్ ఎమ్మెల్యే పద్మా దేవేందర్రెడ్డి అన్నారు.
పింఛన్ రావడంలేదంటూ...
మంత్రి హరీశ్ ప్రసంగం అనంతరం.. పింఛన్లు, నీళ్లు, డబుల్ బెడ్రూం ఇళ్లు మంజూరు కావడం లేదంటూ పలువురు మహిళలు గళమెత్తారు. 60 ఏళ్లు నిండినా.. పింఛను రావడం లేదంటూ పలువులు కన్నీటిపర్యంతం అయ్యారు. ఎన్నిసార్లు ధరఖాస్తు చేసినా ప్రయోజనం లేకపోయిందని వాపోయారు.
ఇవీచూడండి: 'కేంద్రం నుంచి నిధులు తెచ్చాకే... దుబ్బాకలో ఓట్లు అడగాలి'
