భావితరాలు బాగుండాలంటే తప్పకుండా మొక్కలు నాటాలని మెదక్ ఎమ్మెల్యే పద్మా దేవేందర్ రెడ్డి అన్నారు. హరితహారం కార్యక్రమంలో భాగంగా మంగళవారం హవేలిఘన్పూర్ మండలంలోని బూర్గుపల్లిలో మెదక్ జిల్లా కలెక్టర్ ధర్మారెడ్డితో కలిసి ఆమె మొక్కలను నాటారు. ప్రస్తుతం చెట్లు లేకపోవడం వల్ల వర్షాలు సమృద్ధిగా పడటం లేదని ఎమ్మెల్యే అన్నారు.
ప్రభుత్వం హరితహారం కార్యక్రమాన్ని ప్రతిష్ఠాత్మకంగా తీసుకుందని.. అందుకు అనుగుణంగా సర్పంచ్లు, పంచాయతీ కార్యదర్శులు పని చేయాలన్నారు. గ్రామానికి ఒక నర్సరీని ఏర్పాటు చేసి గ్రామస్థులకు అవసరమైన మొక్కలను అందజేస్తామని ఎమ్మెల్యే వివరించారు. హరితహారం కార్యక్రమంలో భాగంగా ప్రతి ఇంటికి ఆరు మొక్కలు అందజేస్తామని.. వాటిని నాటి సంరక్షించాలని అన్నారు. ఈ సందర్భంగా గ్రామంలోని డ్వాక్రా మహిళలకు మొక్కలను పంపిణీ చేశారు.
ప్రభుత్వం కరోనా వైరస్ వ్యాధిగ్రస్తుల పట్ల ప్రత్యేక చర్యలు తీసుకుంటోందని ఎమ్మెల్యే అన్నారు. కరోనా నేపథ్యంలో ప్రజలందరూ మాస్కులు ధరించి, భౌతిక దూరం పాటించడంతో పాటు అవసరమైన జాగ్రత్తలు తీసుకోవాలని సూచించారు. భావితరాలకు కూడా మంచి వాతావరణాన్ని అందించాలనే ముందు చూపుతోనే ముఖ్యమంత్రి కేసీఆర్ హరితహారం కార్యక్రమాన్ని చేపట్టారని మెదక్ జిల్లా కలెక్టర్ ధర్మారెడ్డి అన్నారు. ఈ కార్యక్రమంలో జడ్పీ వైస్ ఛైర్మన్ లావణ్యరెడ్డి, హవేలిఘన్పూర్ జడ్పీటీసీ సుజాత, జడ్పీ సీఈవో లక్ష్మీబాయి, డీఆర్డీవో శ్రీనివాస్, తహసీల్దార్ వెంకటేశం, ఎంపీడీవో సాయిబాబా, ఎంపీవో ప్రవీణ్కుమార్, ఏవో రాజ్కుమార్ పాల్గొన్నారు.
ఇవీ చూడండి: హరిత తెలంగాణకు అందరూ కలిసి రావాలి: మంత్రి తలసాని
