'ఆ పథకం ద్వారా ఎన్నో అభివృద్ధి పనులు చేపట్టొచ్చు'

మెదక్ జిల్లాలోని అన్ని మండల పరిషత్ అభివృద్ధి అధికారులు, ఏపీఓలు, ఏఈలతో కలెక్టర్​ హరీశ్ వీడియో కాన్ఫరెన్స్ నిర్వహించారు. ఉపాధి హామీ పథకం కింద చేపట్టడానికి అవకాశమున్న పనులు గుర్తించాలని అధికారులకు సూచించారు.

ఉపాధి హామీ పథకం కింద గ్రామాల్లో ఎన్నో శాశ్వతమైన అభివృద్ధి పనులు చేపట్టడానికి అవకాశముందని, ఆ దిశగా పనులు గుర్తించాలని అధికారులకు మెదక్ జిల్లా కలెక్టర్ హరీశ్​ సూచించారు. కలెక్టరేట్ నుంచి అన్ని మండల పరిషత్ అభివృద్ధి అధికారులు, మండల పరిషత్ అధికారులు, ఏపీఓలు, ఏఈలతో వీడియో కాన్ఫరెన్స్ నిర్వహించారు.

ప్రణాళిక ఇస్తాం..

ఈ పథకం కింద కూరగాయల సాగు, పెరటి తోటల పెంపకం, సంప్రదాయ పంటలు వంటి సుమారు 30 రకాల పనులు చేపట్టవచ్చని కలెక్టర్​ అన్నారు. పాఠశాలలో చేపట్టిన కిచెన్ షెడ్లు, శౌచాలయాలు పూర్తి చేయాలని అన్నారు. వచ్చే ఆర్థిక సంవత్సరంలో మండలంలో చేపట్టవలసిన అన్ని రకాల పనులపై కార్యాచరణ ప్రణాళిక ఇస్తామని.. అందుకనుగుణంగా లక్ష్య సాధనకు కృషి చేయాలని అన్నారు.

వైకుంఠ ధామాలు, సేగ్రిగేషన్​ షెడ్లు, రైతు కల్లాలను ఏప్రిల్ 15 నాటికి పూర్తి చేయాలని ఆదేశించారు. నర్సరీల ఏర్పాటుకు భూములు గుర్తించాలన్నారు. పల్లె ప్రకృతి వనాలు, నర్సరీల్లో పెద్ద ఎత్తున మొక్కలు నాటాలని, ఫెన్సింగ్ ఏర్పాటు చేయాలని సూచించారు.

ఇదీ చూడండి: పురపాలికల్లో ఇంటిగ్రేటెడ్‌ వెజ్‌, నాన్​వెజ్​ మార్కెట్: కేటీఆర్‌