రోజురోజుకు కొవిడ్ ఉద్ధృతి కొనసాగుతోన్నందున కళాశాలలు ఎప్పుడు తెరుచుకుంటాయో తెలియని పరిస్థితి. ఈ నేపథ్యంలో చదువుకోవాల్సిన విద్యార్థులు ఉపాధి పనులకు వెళ్తున్నారు. మెదక్ జిల్లా కొల్చారం మండలం కొంగోడు అటవీ ప్రాంతంలో అటవీ శాఖ ఆధ్వర్యంలో మొక్కలు నాటుతున్నారు. కొంగోడు, హంసన్పల్లి, పోతిరెడ్డిపల్లి, దామరాంచ గ్రామాలకు చెందిన సుమారు 150 మంది విద్యార్థులు హరితహారం కార్యక్రమంలో దినసరి కూలీగా పాల్గొంటున్నారు.
ఈ విషయమై విద్యార్థులను అడగ్గా.. మహమ్మారి కష్టకాలంలో తల్లిదండ్రులకు చేదోడుగా ఉండాలనే ఉద్దేశంతో తామంతా ఒక బృందంగా ఏర్పడి పనులకు వస్తున్నామన్నారు. దినసరి కూలీగా రూ. 300 ఆర్జిస్తున్నట్లు తెలిపారు. కుటుంబానికి ఆసరగా నిలుస్తున్నామని చెబుతున్నారు.
