లాక్డౌన్తో ఉమ్మడి మహబూబ్నగర్ జిల్లాలో వ్యాక్సినేషన్పై ప్రభావం పడుతోంది. ప్రారంభంలో ఒక్కోరోజు గరిష్ఠంగా 20 వేల నుంచి 30 వేల డోసుల వరకూ ఇచ్చారు. 45 ఏళ్లకు పైబడిన వాళ్లకు, కేవలం రెండో డోసు ఇచ్చే సందర్భంలోనూ నిన్నమొన్నటి వరకూ 5 వేల నుంచి 10 వేల డోసులు ఇచ్చారు. కానీ లాక్డౌన్ సందర్భంగా ఈ సంఖ్య గణనీయంగా పడిపోయింది.
మహబూబ్నగర్ జిల్లాలో ఇవాళ కేవలం 328 డోసులు, నాగర్ కర్నూల్ జిల్లాలో 150 డోసులు, జోగులాంబ గద్వాల జిల్లాలో 110 డోసులు, నారాయణపేట జిల్లాలో 72 డోసులు, వనపర్తి జిల్లాలో 49 డోసులు అందించారు. నిన్న మహబూబ్నగర్ జిల్లాలో 1,500లకు పైగా డోసులు, నాగర్ కర్నూల్లో 1,328 డోసులు, జోగులాంబ గద్వాల జిల్లాలో 558 డోసులు, వనపర్తి జిల్లాలో 892 డోసులు అందించారు.
నిన్నటితో పోల్చినా డోసుల సంఖ్య గణనీయంగా పడిపోయింది. లాక్డౌన్ అమల్లో ఉన్నా వాక్సినేషన్ ప్రక్రియ ఉదయం 9 గంటల నుంచి నాలుగు గంటల వరకూ కొనసాగుతుందని వైద్యారోగ్యశాఖ స్పష్టమైన ప్రకటన చేసింది. లాక్డౌన్ కారణంగా జనం వ్యాక్సిన్ కేంద్రాలకు రాలేకపోయారు. వాక్సిన్ కోసం వెళ్లే వాళ్లు మొదటి డోసు వేయించుకున్నట్లుగా ఆధారాలు చూపితే పోలీసులు అనుమతించాలని స్పష్టమైన ఆదేశాలు జారీ చేశారు. కానీ లాక్డౌన్తో రవాణాకు అవకాశం లేకపోవడంతో ఎక్కువ మంది వ్యాక్సిన్ వేయించుకోలేకపోయారు.
ఇదీ చదవండి: ఆ 4 గంటలు ఎంతో కీలకం.. ఉరుకులు పరుగులతో రోజువారీ పనులు
