ఆర్టీసీకి అద్దెబస్సులను నడుపుతున్న వాహన యజమానులు, డ్రైవర్లు తీవ్ర ఇబ్బంది పడుతున్నారు. ఉమ్మడి పాలమూరు జిల్లాలో ఆర్టీసీ 388 అద్దె బస్సులు నడుస్తున్నాయి. మార్చి 22 నుంచి మే వరకూ లాక్‌డౌన్ విధింపుతో ఆర్టీసీ అన్నిరకాల సర్వీసుల్ని నిలిపివేసింది. అద్దెబస్సుల యజమానుల పరిస్థితి అగమ్యగోచరంగా మారింది. బకాయిపడ్డ డబ్బులు అందక యజమానులు బస్సులు నడపలేని పరిస్థితి నెలకొంది. బస్సు నడిచినా, నడవకపోయినా నెలవారీ ఫైనాన్స్ చెల్లించక తప్పదు. ఆదాయం లేక వడ్డీల భారం పెరిగిపోతోంది.
బకాయిలు చెల్లించాలి..
ప్రస్తుతం ఎక్స్‌ప్రెస్‌ బస్సులను మాత్రమే నడపాలని అధికారులు నిర్ణయించారు. గ్రామాల నుంచి ముఖ్య పట్టణాలకు వచ్చేరూట్లలో నడిచే అద్దెబస్సులు ఆగిపోయాయి. మహబూబ్‌నగర్ డిపో పరిధిలో 12 బస్సులను మాత్రమే పునరుద్ధరించగా మిగిలినవి ఇళ్లకే పరిమితమయ్యాయి. పూర్తి బకాయిలు చెల్లించి పల్లెవెలుగు బస్సులు నడపాలని యజమానులు కోరుతున్నారు. మహబూబ్‌గర్ రీజియన్ పరిధిలోనే ఆర్టీసీ రూ.7 కోట్ల 94లక్షలు చెల్లించాల్సి ఉందని అద్దెబస్సుల యజమానులు చెబుతున్నారు.
డ్రైవర్లకు జీవనోపాధి కరవు
అద్దెబస్సులను నడిపే డ్రైవర్లు 3 నెలలుగా జీవనోపాధి కోల్పోయారు. బస్సులు నడవకపోవడం వల్ల యజమానులు వేతనాలు చెల్లించలేదు. ప్రస్తుతం బస్సులు పునరుద్ధరిస్తున్నా ఆ జీతం ఏ మూలకు సరిపోవడం లేదని డ్రైవర్లు ఆవేదన వ్యక్తం చేస్తున్నారు.
దశలవారీగా అందుబాటులోకి తెస్తాం
ప్రస్తుతానికి డిమాండ్ ఉన్న రూట్లలోనే అద్దెబస్సులు పునురుద్ధరిస్తున్నామని, ఆదాయం లేని మార్గాల్లో ప్రజల సౌకర్యం కోసం దశలవారీగా అందుబాటులోకి తెస్తామని డిపో మేనేజర్ అశోక్ రాజు వెల్లడించారు. ఆర్టీసీనే నమ్ముకున్న అద్దెబస్సుల యజమానులు, డ్రైవర్ల భవితవ్యం ప్రశ్నార్థకంగా మారింది.
ఇదీ చూడండి:
