మతిస్థిమితంలేని ఓ యువకునికి చికిత్స చేయించి... స్వచ్ఛంద సంస్థలో చేర్పించి మహబూబాబాద్ పోలీసులు మానవత్వం చాటుకున్నారు. పట్టణంలోని అంబేద్కర్నగర్లో తిరుగుతున్న ఓ అపరిచిత వ్యక్తిని దొంగగా భావించిన కాలనీ వాసులు పోలీసులకు సమాచారం అందించారు. పట్టణ సీఐ వెంకటరత్నం ఆదేశాలతో ఎస్సై మురళీధర్రాజు తన సిబ్బందితో కలిసి కాలనీకి వెళ్ళారు. పోలీసులను చూసిన అపరిచిత వ్యక్తి తప్పించుకునే ప్రయత్నం చేశాడు.
చీకటిలో సుమారు 2 గంటల పాటు శ్రమించిన పోలీసులు... అపరిచిత వ్యక్తిని పట్టుకున్నారు. విచారించగా... ఊరు, పేరు సరిగా చెప్పకపోవటం వల్ల మతిస్థిమితం సరిగాలేదని గుర్తించారు. యువకుడిని ప్రభుత్వ ఆస్పత్రికి... అటు నుంచి హైదరాబాద్ ఎర్రగడ్డలోని మానసిక ఆస్పత్రిలో చేర్పించి చికిత్స జరిపించారు. ఆ యువకుడిని ఆశ్రమంలో చేర్చుకోవాలని.. ఖమ్మంలోని అన్నం సేవా ఫౌండేషన్ను సీఐ వెంకటరత్నం కోరారు. ఫౌండేషన్ నిర్వాహకులు అన్నం. శ్రీనివాసరావు... సదరు యువకుడిని తమ ఆశ్రమానికి తీసుకెళ్లారు. ఆశ్రమంలో చికిత్స అందించి పూర్వ స్థితికి తీసుకొస్తామని... యువకుని వివరాలు తెలిస్తే... తమను సంప్రదించాలని ఫౌండేషన్ నిర్వాహకులు కోరారు.
