మహబూబాబాద్ జిల్లా డోర్నకల్ నియోజకవర్గ వ్యాప్తంగా ఎడతెరిపి లేకుండా వర్షాలు కురుస్తున్నాయి. గత నాలుగు రోజులుగా కురుస్తున్న వర్షాలతో వాగులు పొంగి పొర్లుతున్నాయి. వర్షాలకు డోర్నకల్లోని మున్నేరు, నరసింహులపేట, చిన్నగూడూరు మండలాల్లోని ఆకేరు, దంతాలపల్లి మండలంలోని పాలేరు వాగులకు వరద ఉధృతి కొనసాగుతోంది.
వాగులపై నిర్మించిన చెక్ డ్యాంలు నిండి వరద నీరు పరుగులు పెడుతోంది. దంతాలపల్లి మండలం పెద్దముప్పారం శివారులోని పాలేరు వాగులో లెవల్ బ్రిడ్జి పైనుంచి మూడు అడుగులకు పైగా వరద నీరు ప్రవహిస్తోంది. దీంతో పెద్ద ముప్పారం గ్రామం నుంచి దంతాలపల్లి గ్రామాల మధ్య రాకపోకలు నిలిచిపోయాయి. మహిళలు వరద నీటిలో పసుపు కుంకుమ వేసి పూజలు నిర్వహించారు.
అన్ని గ్రామాల్లోని చెరువులు నిండి మత్తళ్లు పోస్తున్నాయి. మత్తళ్ల వద్ద చేపలు పట్టేందుకు వివిధ గ్రామాల ప్రజలు పెద్ద ఎత్తున తరలివచ్చారు. వర్షాలకు వరి పంటలు నీట మునిగి రైతులు ఆందోళన చెందుతున్నారు. పత్తి, పెసర పంటలకు తీరని నష్టం వాటిల్లింది.
దంతాలపల్లి మండలం పెద్దముప్పారంలోని బండారు చెరువు కట్ట మధ్య భాగంలో మట్టి కుంగిపోయి భారీ గుంత ఏర్పడింది. దీనికి తోడు గత మూడు రోజుల నుంచి కురుస్తున్న వర్షాలకు చెరువు కట్ట మరింత కుంగిపోయి కోతకు గురైంది. చెరువు కట్ట తెగిపోయే ప్రమాదం పొంచి ఉందని గ్రామస్థులు భయాందోళనకు గురవుతున్నారు.
రూ.1.34 కోట్లతో గతేడాది చేపట్టిన రోడ్డు నిర్మాణ పనులు నాసిరకంగా చేపట్టడం వల్లనే కట్ట కుంగిపోయిందని రైతులు, గ్రామస్థులు ఆరోపిస్తున్నారు. సమాచారం అందుకున్న నీటిపారుదల, పంచాయతీరాజ్ శాఖల అధికారులు చెరువు కట్టపై మరమ్మత్తు పనులు యుద్ధప్రాతిపదికన చేపట్టారు. రెండు రోజుల్లో మరమ్మతు పనులు పూర్తి చేయనున్నట్లు అధికారులు తెలిపారు.
ఇవీ చూడండి: ఎర్రకోటపై మువ్వన్నెల జెండా రెపరెపలు
