దోస్త్ కావాలి... ప్రవేశాలు కల్పించండి

దశాబ్దాలుగా మారుమూల ప్రాంతాల్లోని విద్యార్థులకు ఉన్నత విద్య అందించిన ఎస్కేఈ కళాశాల దోస్త్​లో పేరు లేకపోవడంతో విద్యార్థులు ఆందోళన చెందుతున్నారు. వెంటనే అధ్యాపకులను నియమించి... ప్రవేశాలు కల్పించాలని డిమాండ్ చేస్తున్నారు.

ఉమ్మడి ఆదిలాబాద్ జిల్లాలోని ఏకైక ఎయిడెడ్ డిగ్రీ కళాశాల... సిర్పూర్ కాగజ్ నగర్ ఎంప్లాయిస్ డిగ్రీ కళాశాల. దశాబ్దాలుగా మారుమూల ప్రాంతాల్లోని గిరిజన, గిరిజనేతర విద్యార్థులకు ఉన్నత విద్యను అందించిన ఈ కళాశాల చరిత్రపుటలకే పరిమితం కానుందా అనే సందేహం వ్యక్తమవుతోంది. ఈ సారి దోస్త్ నోటిఫికేషన్​లో ఎస్కేఈ కళాశాల పేరు లేకపోవడం వల్ల ఈ ఏడాది ప్రథమ సంవత్సరం ప్రవేశాలు లేనట్లుగానే తెలుస్తోంది.

ఒక్కరోజు వేతనంతో ఏర్పాటు

పారిశ్రామిక ప్రాంతమైన కాగజ్ నగర్​లో సర్సిల్క్ మిల్లు, సిర్పూర్ కాగితం మిల్లు కార్మికుల ఒకరోజు వేతనంతో సిర్పూర్ కాగజ్ నగర్ ఎంప్లాయిస్ డిగ్రీ కళాశాల 1982- 83 వ సంవత్సరంలో స్థాపించారు. కార్మికుల పిల్లలతో పాటు ఇతర గ్రామీణ ప్రాంతాల విద్యార్థులకు ఉన్నత చదువుల కోసం కళాశాలను ఏర్పాటు చేశారు. 1990లో ఎయిడెడ్ వచ్చింది. అప్పట్లో ఈ కళాశాలలో సీటు దొరకని పరిస్థితి ఉండేది.

ప్రస్తుతం 6 విద్యార్థులు

ప్రతిభావంతులైన 29 మంది అధ్యాపకులు ఉండడంతో విద్యార్థులు ఉత్తమ ఫలితాలు సాధించారు. 2006 మార్చి 27న అప్పటి ప్రభుత్వం ఎయిడెడ్ కళాశాలలో అధ్యాపకుల ఉద్యోగ భర్తీని నిలిపివేస్తూ జీవో 35ను విడుదల చేసింది. అప్పటి నుంచి ఈ కళాశాలలో అధ్యాపకులను నియమించలేదు. ప్రస్తుతం ఏడుగురు సిబ్బంది మాత్రమే ఉన్నారు. గతేడాది ఈ కళాశాలలో 6 గురు విద్యార్థులు చేరాలంటే పరిస్థితి ఎలా మారిందో అర్థం చేసుకోవచ్చు.

ఎన్నికల హామీగానే

ఒకప్పుడు విద్యార్థులతో కళకళలాడిన ఈ కళాశాల ఇప్పుడు విద్యార్థులు లేక వెలవెలబోతోంది. ప్రస్తుతం ప్రథమ, ద్వితీయ, తృతీయ సంవత్సరాలు కలిసి మొత్తం 72 మంది విద్యార్థులు మాత్రమే ఉన్నారు. ఎన్నికల హామీగానే ఈ కళాశాల ఉపయోగపడుతోంది తప్ప ఎలాంటి పరిష్కారం లేదని విద్యార్థి సంఘాల నేతలు ఆరోపిస్తున్నారు. కళాశాలను ప్రభుత్వం స్వాధీనం చేసుకోవాలని డిమాండ్ చేస్తున్నారు.

ఇదీ చూడండి: ఓట్ల లెక్కింపునకు మార్గం సుగమం