వర్షాకాలంలో సీజనల్ వ్యాధుల నుంచి ప్రజలను కాపాడేందుకు రాష్ట్ర ప్రభుత్వం 8 రోజుల పాటు ప్రత్యేక పారిశుద్ధ్య కార్యక్రమాన్ని చేపట్టినట్లు రవాణా శాఖ మంత్రి పువ్వాడ అజయ్కుమార్ పేర్కొన్నారు. ఖమ్మం జిల్లా తల్లాడ మండలంలో పారిశుద్ధ్య వారోత్సవాల ముగింపు కార్యక్రమంలో ఎంపీ నామా నాగేశ్వరరావు, ఎమ్మెల్యే సండ్ర వెంకటవీరయ్యతో కలిసి ఆయన పాల్గొన్నారు. ఈ సందర్భంగా తల్లాడ రింగ్‌రోడ్‌ కూడలిలో రహదారి వెంట పారిశుద్ధ్య పనులను పరిశీలించారు. ఓ దుకాణం ఎదుట చెత్త వేసి ఉండటం వల్ల ఆ దుకాణదారుడికి జరిమానా విధించాలని పంచాయతీ అధికారులను ఆదేశించారు. అనంతరం అంజనాపురంలో రూ.1.5 కోట్లతో నిర్మించనున్న రహదారికి శంకుస్థాపన చేశారు. ఈ సందర్భంగా గ్రామంలో ఏర్పాటు చేసిన పారిశుద్ధ్య వారోత్సవాల ముగింపు సభలో మంత్రి మాట్లాడారు.
''పట్టణ, పల్లెప్రగతి కార్యక్రమాలు విజయవంతం అయ్యేందుకు జిల్లా యంత్రాంగం చక్కటి కృషి చేశారు. ఈ సందర్భంగా కలెక్టర్‌ ఆర్.వి. కర్ణన్‌, అదనపు కలెక్టర్‌ స్నేహలతలను అభినందిస్తున్నా. అందరి సహకారంతో 33 జిల్లాల్లో ఖమ్మం 2వ స్థానంలో నిలిచింది. దీనికి గర్వపడుతున్నాను. పట్టణ, పల్లెప్రగతి కార్యక్రమాలు నిరంతర ప్రక్రియ. కరోనా విజృంభిస్తున్న సమయంలో సీజనల్ వ్యాధులు ప్రబలకుండా ఉండేందుకు ముఖ్యమంత్రి కేసీఆర్‌ ఈ ప్రత్యేక కార్యక్రమాన్ని రూపొందించారు. గతంలో ఏ ప్రభుత్వం చేయని విధంగా బడ్జెట్‌ నుంచి గ్రామ పంచాయతీలకు ప్రతి నెలా నిధులు కేటాయిస్తున్నారు. ప్రజాప్రతినిధులు వీటిని సద్వినియోగం చేసుకుని గ్రామాల అభివృద్ధికి కృషి చేయాలి.''
-పువ్వాడ అజయ్కుమార్, మంత్రి
కార్యక్రమంలో ఎమ్మెల్సీ బాలసాని లక్ష్మీనారాయణ, డీసీఎంఎస్‌ ఛైర్మన్‌ రాయల వెంకట శేషగిరిరావు, రైతు సమన్వయ సమితి కన్వీనర్‌ నల్లమల వెంకటేశ్వరరావు, పలువురు అధికారులు పాల్గొన్నారు.
ఇదీచూడండి: దేశవ్యాప్తంగా తెరుచుకున్న ఆలయాలు- మాస్కులతో భక్తులు
