Biodiversity In Manuguru Forest: భద్రాద్రి కొత్తగూడెం జిల్లా మణుగూరు అటవీ డివిజన్‌లో పలు రకాల వృక్షాలతో పాటు.. పెద్దసంఖ్యలో వనజీవులున్నాయి. బొగ్గు గనులు, గోదావరిపై ఆనకట్టల నిర్మాణాలు, విద్యుత్‌ కేంద్రాలకు రైల్‌ మార్గం అలా అన్నీ అటవీ భూభాగం మీదుగానే విస్తరించాయి. ఇంకా విస్తరిస్తుండటంతో.. అడవి, వన్యప్రాణుల ఉనికికి ప్రమాదం ఏర్పడుతోంది. ఈ తరుణంలో వన్యప్రాణుల సంతతిని పెంచేందుకు.. అధికార యంత్రాంగం రాష్ట్రంలో ఎక్కడా లేనివిధంగా వినూత్న పద్ధతులను తెరపైకి తెచ్చింది. గడ్డిజాతి ప్రాణులు, పక్షి జాతుల వృద్ధిపై ప్రత్యేక దృష్టిసారించారు. 6 నెలలుగా ప్రత్యేక కార్యక్రమాలు అమలు చేస్తూ సానుకూల ఫలితాలు సాధిస్తున్నారు.
అడవిలో గడ్డి పెంపకం: అటవీ డివిజన్‌లో మూడుచోట్ల సోలార్‌ వ్యవస్థ ఏర్పాటు చేశారు. 6 బోర్లు వేసి.. కొలనులు నిర్మించారు. నిరంతరాయంగా ఆ బోరు నీరు కొలనులో చేరుతోంది. అదేచోట ఫైబర్ ఎక్కువగా.. ఉండే గడ్డి విత్తనాలు చల్లారు. నీరు అందడం వల్ల గడ్డి ఏపుగా పెరిగింది. ఆ గడ్డిని తిని నీరుతాగి జంతువులు ముందుకెళ్తున్నాయి. వేసవిలో జంతువుల అలసట తీర్చడంలో భాగంగా గడ్డి విస్తరించిన ప్రాంతాల్లో ఉప్పుతో కలిపిన రేగడి మట్టి గుంతలు ఏర్పాటు చేశారు. తద్వారా జంతువులకు లవణాలు అందుతున్నాయి. మార్చి నుంచి గడ్డి ఎండిపోతుండటంతో ఆహారం లభించక.. చాలా ప్రాణులు చనిపోతున్నాయి. ఆ విషయాన్ని గుర్తించిన అధికారులు ఫిబ్రవరి నుంచి జూన్‌ వరకు వాటికి ఆహారం అందించేందుకు గడ్డి పెంపకం చేపట్టారు.
పక్షిజాతుల కోసం కొలను ఏర్పాటు చేశారు. వెదురుజాతి చెట్లున్న చోట సుమారు 10 హెక్టార్ల విస్తీర్ణంలో అందుబాటులోకి తెచ్చారు. కొలను చుట్టూ గడ్డి పెంచి పురుగులు, పాముల సంచారం పెరిగేలా చర్యలు చేపట్టారు. పురుగులు వస్తే తొండలు, కప్పలు చేరతాయి. వాటికోసం పక్షులు వచ్చి వాలుతాయి. వచ్చిన పక్షులు గూళ్లు పెట్టుకునేందుకు వీలుగా వెదురు కర్రలు ఉపయోగపడుతున్నాయి. నేలపై పడిన విత్తనాలు అగ్గికి కాలిపోకుండా కాపాడి మొక్కలు సంరక్షించారు. ఆ మొక్కలు జంతువులకు ఆహారంగా మారాయి.
ఆ విధంగా వాటి సంరక్షణకు శ్రీకారంచుట్టినట్లు అటవీ అధికారులు చెబుతున్నారు. అటవీ సంరక్షణకు మణుగూరు అటవీ అధికారులు, సిబ్బంది చేస్తున్న కృషిపై ప్రశంసలు వస్తున్నాయి. రాష్ట్రవ్యాప్తంగా అన్నీ అటవీ డివిజన్ల పరిధిలో ఈ తరహా కార్యక్రమాలు చేపడితే అడవులు పది కాలాల పాటు పచ్చగా కళకళలాడుతుందనడంలో ఏమాత్రం సందేహం లేదు.
"బుగ్గ ఈస్ట్ ఫారెస్ట్ను ఎందుకు సెలక్ట్ చేసుకున్నామంటే.. ఇక్కడ మనుషుల సంచారం ఎక్కువగా లేదు. ఈ ప్రాంతంలో చెక్పోస్ట్ ఉండడం వల్ల మనుషులు సంచారం అంతగా లేదు. రాబోయే రోజుల్లో వన్య ప్రాణులకు కావాల్సిన అన్ని వసతులను కల్పిస్తాం. పర్యాటకులు వీక్షించడానికి వ్యూ పాయింట్ కూడా ఏర్పాటు చేయబోతున్నాము." - మక్సూద్ మొయినుద్దీన్, ఫారెస్ట్ డివిజన్ అధికారి
ఇవీ చదవండి:
