ఖమ్మం జిల్లాలో ఘనంగా సీఎం పుట్టినరోజు వేడుకలు

ఖమ్మం జిల్లా వ్యాప్తంగా సీఎం కేసీఆర్​ పుట్టినరోజు వేడుకలు ఘనంగా జరిగాయి. ప్రజాప్రతినిధులు, పార్టీ శ్రేణులు వేడుకల్లో ఉత్సాహంగా పాల్గొన్నారు. కోటి వృక్షార్చనలో భాగంగా మొక్కలు నాటారు. కేక్​ కోసి ముఖ్యమంత్రికి జన్మదిన శుభాకాంక్షలు తెలిపారు. సీఎం నిండు నూరేళ్లు సుఖసంతోషాలతో వర్ధిల్లాలని ఆకాంక్షించారు.

తెరాస అధినేత, ముఖ్యమంత్రి కేసీఆర్ జన్మదిన వేడుకలు ఖమ్మం జిల్లాలో ఘనంగా జరిగాయి. వేడుకలను పార్టీ నేతలు, గులాబీ శ్రేణులు ఘనంగా నిర్వహించారు. సీఎం పుట్టినరోజు సందర్భంగా ఎంపీ సంతోశ్​కుమార్ చేపట్టిన కోటి వృక్షార్చన కార్యక్రమంలో రవాణా శాఖ మంత్రి పువ్వాడ అజయ్​కుమార్, ఎంపీ నామ నాగేశ్వరరావు పాల్గొన్నారు. నగరంలోని పలు డివిజన్లలో మొక్కలు నాటారు. అనంతరం జిల్లా పార్టీ కార్యాలయంలో కేసీఆర్ జన్మదిన వేడుకలు నిర్వహించారు.

అటు సత్తుపల్లిలో ఎమ్మెల్యే సండ్ర, కూసుమంచిలో ఎమ్మెల్యే కందాళ ఉపేందర్​రెడ్డి మొక్కలు నాటారు. జిల్లా పరిషత్ ఛైర్మన్​ కమల్​రాజు ముదిగొండలో మొక్కలు నాటగా.. డీసీసీబీ ఛైర్మన్ కూరాకుల నాగ భూషయ్య ఖమ్మం 8వ డివిజన్​లో మొక్కలు నాటారు. పోరాడి సాధించుకున్న రాష్ట్రాన్ని.. బంగారు తెలంగాణ చేసే లక్ష్యంతో ముందుకెళ్తోన్న సీఎం కేసీఆర్ నిండు నూరేళ్లు ఆయురారోగ్యాలతో వర్ధిల్లాలని మంత్రి పువ్వాడ ఆకాంక్షించారు.

ఇదీ చదవండి: కేసీఆర్ మా తండ్రి కావడం అదృష్టం: కేటీఆర్, కవిత