ఆదాయం ఘనం.... అభివృద్ధి శూన్యం..

ఆ రైల్వే స్టేషన్​ నుంచి కోట్లల్లో ఆదాయం వస్తోంది. వేల కోట్లు విలువ చేసే సరుకులు ఎగుమతి, దిగుమతి చేస్తుంటారు. అయినా అక్కడ సౌకర్యాలు శూన్యం. కనీస అభివృద్ధికి నోచుకోని కరీంనగర్​ రైల్వే స్టేషన్​ పరిస్థితి ఇది.

దక్షిణమధ్య రైల్వేకు సరుకు రవాణాలో అత్యధిక ఆదాయం వచ్చే రైల్వే స్టేషన్లలో కరీంనగర్‌ ఒకటి. రాబడి ఉన్నా.. వసతుల కల్పనలో అధికారులు శ్రద్ధ చూపడం లేదు. ఇక్కడికి సిమెంట్‌, యూరియా భారీ మొత్తంలో దిగుమతి చేసుకుంటారు. ఏటా లక్ష 50వేల టన్నుల గ్రానైట్‌, 2 లక్షల టన్నుల బియ్యం ఇతర ప్రాంతాలకు ఎగుమతి అవుతున్నాయి. సరుకులు నిల్వ ఉంచుకోవడానికి సరైన సదుపాయాలు లేవని వ్యాపారులు ఆందోళన వ్యక్తం చేస్తున్నారు.

జరిమానా కూడా

రైలు వ్యాగన్లలో తెప్పించిన సరుకును 8గంటల్లోపు దించుకోవాలన్న నిబంధన ఉంది. అలా చేయని పక్షంలో మొదటి గంట రూ.16 వేలు, రెండో గంటకు రూ.25వేలు, మూడో గంటకు రూ.30వేలుజరిమానా వసూలు చేస్తున్నారని వ్యాపారులు వాపోతున్నారు.

ఓవర్​ బ్రిడ్జి

మరోవైపు రైల్వేస్టేషన్ సమీపంలో లెవల్ క్రాసింగ్ వద్ద ఓవర్‌ బ్రిడ్జి లేకపోవడం ప్రజలను ఇబ్బంది పెడుతోంది. గూడ్స్‌ రైళ్లు ఎక్కువగా రావటంతో వాహనాలు బారులు తీరుతున్నాయి. రైల్వేగేటు సమీపంలోనే ఆసుపత్రులు అధికంగా ఉండటంతో అంబులెన్సులకు కూడా అవాంతరాలు ఎదురవుతున్నాయి.

ఓవర్‌ బ్రిడ్జి నిర్మించడంతో పాటు గూడ్స్‌ షెడ్‌ వద్ద తగు సదుపాయాలు కల్పించాలని ప్రజలు, వ్యాపారులు కోరుతున్నారు.

ఇవీ చూడండి:"ప్రభుత్వ వైఫల్యాలపై నిలదీయండి"