ఈ ఏడాది ఆశించిన మేర వరద వృద్ధి ఉండటం వల్ల జూరాల, శ్రీశైలం జల విద్యుత్ కేంద్రాల్లో గతం కంటే ఎక్కువ విద్యుత్ను ఉత్పత్తి చేసుకోవచ్చని జెన్కో, ట్రాన్స్కో సీఎండీ ప్రభాకర్ రావు ఆశాభావం వ్యక్తం చేశారు. జోగులాంబ గద్వాల జిల్లాలోని జూరాల ఎగువ జల విద్యుత్ కేంద్రాన్ని ప్రభాకర్రావు సందర్శించారు. జూరాల జల విద్యుత్ కేంద్రంలో ఉన్న 6 యూనిట్లకు గాను ఐదు యూనిట్లు విద్యుత్ ఉత్పత్తి కొనసాగుతుందన్నారు.
5వ యూనిట్ గత కొన్ని రోజుల నుంచి సాంకేతిక కారణాల వల్ల విద్యుత్ ఉత్పత్తి చేయడం లేదు. ఇందుకు సంబంధించి యూనిట్ యొక్క స్థితిగతులను ఇంజినీర్లు, అధికారులను అడిగి వివరాలు తెలుసుకున్నారు. జల విద్యుత్ కేంద్రంలో ఉన్న అర్బన్లను పరిశీలించారు. గతేడాది 10 వేల మెగావాట్ల విద్యుత్ ఉత్పత్తి చేసుకున్నామని... ఈ ఏడాది 13 వేల మెగావాట్లు పైగానే ఉత్పత్తి చేసుకోవచ్చని తెలిపారు. ఈ ఏడాది ముందుగానే వరదలు రావటం వల్ల ఎగువ జూరాలలో ఐదు యూనిట్లు దిగువ జూరాలలో 6 యూనిట్ల చొప్పున... అలాగే శ్రీశైలంలోనూ విద్యుత్ ఉత్పత్తిని ప్రారంభించామని ప్రభాకర్రావు తెలిపారు.
