జగిత్యాల పుర ఓట్ల లెక్కింపునకు రంగం సిద్ధం

జగిత్యాల జిల్లాలోని పురపాలక సంఘాల ఎన్నికల ఓట్ల లెక్కింపునకు అధికారులు రంగం సిద్ధం చేశారు. జగిత్యాల పట్టణంలోని వీఆర్కే ఇంజినీరింగ్​ కళాశాలలో వేర్వేరు గదుల్లో 260 టేబుళ్లు ఏర్పాటు చేసి 314 మంది ఉద్యోగులు, ఉపాధ్యాయులకు బాధ్యతలు అప్పగించారు.

జగిత్యాల జిల్లాలోని పురపాలక సంఘాల ఎన్నికల ఓట్ల లెక్కింపు కోసం అధికారులు ఏర్పాట్లు సిద్ధం చేశారు. ఐదు పట్టణాలు జగిత్యాల, కోరుట్ల, మెట్​పల్లి, ధర్మపురి, రాయికల్ పురపాలికల ఓట్ల పెట్టెలు జగిత్యాల వీఆర్‌కే ఇంజినీరింగ్‌ కళాశాలలో భద్రపరిచారు.

ఓట్ల లెక్కింపు కోసం పట్టణాల వారీగా వేర్వేరు గదుల్లో టేబుళ్లు ఏర్పాట్లు చేసి అధికారులు, సిబ్బందికి శిక్షణ ఇచ్చారు. ఓట్లు లెక్కించేందుకు 260 టేబుళ్లు ఏర్పాటు చేసి 314 మంది ఉద్యోగులు, ఉపాధ్యాయులకు బాధ్యతలు అప్పగించారు.

మొదట పోస్టల్‌ ఓట్లు లెక్కించిన వెంటనే బ్యాలెట్‌ పెట్టెల సీలు తీసి వార్డుల వారీగా ఓట్లు లెక్కిస్తారు. టేబుళ్ల సంఖ్య ఎక్కువగా ఉండటం వల్ల అన్ని వార్డుల కౌంటింగ్​ ఒకేసారి ప్రారంభమవుతుంది.

వీఆర్‌కే ఇంజినీరింగ్‌ కళాశాల వద్ద పోలీసులు భారీ భద్రత ఏర్పాటు చేశారు. కౌంటింగ్ కేంద్రంలోకి కేవలం అభ్యర్థులు, అనుమతి ఉన్న ఏజెంట్లను లోపలికి అనుమతిస్తామని పోలీసులు స్పష్టం చేశారు.

• ఇదీ చూడండి : కుటుంబ సభ్యులతో కలిసి ఓటు వేసిన మంత్రి గంగుల