తెలంగాణ ఆర్టీసీ.. కార్గో సేవల్లో ఒక్కో అడుగు ముందుకేస్తోంది. విస్తరణలో భాగంగా సరికొత్త వ్యూహాలతో ముందుకెళ్తున్నామని.. కార్గో విభాగం ప్రత్యేకాధికారి ఎస్. కృష్ణకాంత్ వెల్లడించారు. పొరుగు రాష్ట్రమైన ఆంధ్రప్రదేశ్లో కార్గో సేవల విస్తరణకు కార్యాచరణ అమలుచేస్తున్నట్లు చెప్పారు.
ఇందులో భాగంగా హైదరాబాద్ శివారులోని శంషాబాద్ విమానాశ్రయం నుంచి నేరుగా ఏపీలోని విశాఖపట్టణానికి కార్గో సేవల్ని ప్రారంభించామన్నారు. హైదరాబాద్లోని వివిధ ప్రాంతాల నుంచి ఎయిర్పోర్టు మీదుగా వ్యాపార కేంద్రాలైన విజయవాడ, విశాఖపట్టణాలకు.. నిత్యం నేరుగా కార్గో సర్వీసులను నడుపుతున్నట్లు ఎస్. కృష్ణకాంత్ తెలిపారు.
10 మెట్రిక్ టన్నుల సామర్థ్యం కలిగిన కార్గో వాహనాలు... పటాన్చెరు, మెహదీపట్నం, లక్డీకాపూల్, సీబీఎస్ నుంచి అందుబాటులో ఉన్నాయని తెలిపారు. హైదరాబాద్లో బయలుదేరిన కార్గో సర్వీసులు.. కనెక్టడ్ పాయింట్లు.. కోదాడ, సూర్యాపేట, విజయవాడ, రాజమండ్రి, అన్నవరం, తుని మీదుగా విశాఖపట్టణం చేరుకుంటాయని పేర్కొన్నారు.
ఇల్లు మారుతున్నప్పుడు, గృహ నిర్మాణం, పరిశ్రమలకు సంబంధించిన వస్తువులు, ఫర్నీచర్తో పాటు ఇతరత్రా సామగ్రి తరలించేందుకు ఈ ప్రత్యేక కార్గో సర్వీసులు అందుబాటులో ఉంటాయని తెలిపారు. దూరం, వస్తు పరిమాణం బట్టి నిర్దిష్టమైన ధరలను నిర్ణయించినట్లు పేర్కొన్నారు. పూర్తి సమాచారం కోసం https://www.tsrtc.telangana.gov.in వెబ్సైట్ను చూడవచ్చన్నారు.
