హైదరాబాద్కు చెందిన ఇంజనీరింగ్ విద్యార్థి మహ్మద్ అకీల్‌ది నిరుపేద కుటుంబం. తండ్రి చెప్పులు తయారు చేస్తూ కుటుంబాన్ని పోషిస్తున్నాడు. లాక్డౌన్ ఆర్థిక ఇబ్బందులు తలెత్తడంతో అకీల్ జొమాటోలో ఫుడ్ డెలివరీ బాయ్లా జాయిన్ అయ్యాడు. బైక్ లేకపోయినా సైకిల్పై దాదాపు 80 కి.మీలు ప్రయాణిస్తూ ఫుడ్ డెలివరీ చేస్తున్నాడు. సైకిల్పై అన్ని కిలోమీటర్లు వెళ్లడం కష్టమైనా తన కుటుంబ పోషణ కోసం తప్పదని.. తాను ఇంకా బాగా చదువుకోవాలనుకుంటున్నానని 'ఈటీవీ భారత్'తో అకీల్ తన అభిప్రాయాన్ని పంచుకున్నాడు.
'ఈటీవీ భారత్ ఉర్దూ'లో ప్రసారమైన కథనాన్ని చూసి 'ది గ్రేట్ హైదరాబాద్ ఫుడ్ అండ్ ట్రావెల్ క్లబ్ ' అకీల్కు సాయం చేయాలని నిర్ణయించుకుంది. అకీల్కు బైక్ కొనివ్వడం కోసం ఆ సంస్థ సభ్యుడు రాబిన్ ముకేష్.. సామాజిక మాధ్యమాల ద్వారా విరాళాలు సేకరించారు. 24 గంటల్లోనే రూ. 73,370 సేకరించారు. ఈ డబ్బుతో అకీల్కు రెండు రోజుల్లో ద్విచక్ర వాహనాన్ని కొనిస్తామని తెలిపారు. సాయం చేసిన దాతలకు, 'ది గ్రేట్ హైదరాబాద్ ఫుడ్ అండ్ ట్రావెల్ క్లబ్ ' సంస్థకు, ఈటీవీ భారత్‌కు అకీల్ కృతజ్ఞతలు తెలిపారు.
ఇదీ చదవండి: తెరాస లోక్‌సభాపక్ష నేత నామా నాగేశ్వరరావుకు ఈడీ సమన్లు
