ఇంటి పైకప్పు కూలి బాలుడు చనిపోయిన ఘటన చిలకలగూడ పోలీస్ స్టేషన్ పరిధిలో చోటుచేసుకుంది. తెల్లవారుజామున జరిగిన ఈ ప్రమాదంలో బాలుడి తల్లికి తీవ్ర గాయలయ్యాయి. ఆమెను హుటాహుటిన గాంధీ ఆసుపత్రికి తరలించారు. పురాతన ఇల్లు కావడం వల్లే ఈ ప్రమాదం జరిగిందని స్థానికులు తెలిపారు. ఒక్కసారిగా మట్టి కుప్పలు బాలుడిపై పడడం వల్ల అక్కడికక్కడే మృతిచెందాడని బాలుడి బాబాయ్ తెలిపారు. ప్రస్తుతం చిన్నారి కుటుంబ సభ్యులు ఆ ఇంట్లో అద్దెకు ఉంటున్నట్లు చెప్పారు.
ఘటనా స్థలాన్ని జీహెచ్ఎంసీ డిప్యూటీ కమిషనర్ రవికుమార్, స్థానిక కార్పొరేటర్ హేమ పరిశీలించారు. ఘటనకు సంబంధించిన వివరాలను స్థానికులను అడిగి తెలుసుకున్నారు. ఈ సంఘటనలో బాలుడు మృతి చెందటం బాధకరమన్నారు. పాత భవనాలకు నోటీసులు ఇచ్చినప్పటికీ ప్రజలు కోర్టుకు వెళ్లి... వాటిలోనే ఉండేందుకు ఇష్టపడుతున్నారని రవికుమార్ అన్నారు.
బాలుడు చనిపోయిన ఇంటికి మరొక ఇల్లు అనుకొని ఉండడం వల్లనే ఈ ఘటన జరిగిందని రవి కుమార్ తెలిపారు. చనిపోయిన బాలుడి కుటుంబానికి నష్టపరిహారం వచ్చే విధంగా కృషి చేస్తానని హామీ ఇచ్చారు. పురాతన భవనాల పట్ల ప్రజలు అప్రమత్తంగా ఉండాలని... వీలైనంత త్వరగా వాటిని ఖాళీ చేయాలని డిప్యూటీ కమిషనర్ సూచించారు.
