Telangana Loans News : ఎఫ్ఆర్బీఎమ్ పరిధిలోకి లోబడి రాష్ట్ర ప్రభుత్వం తీసుకునే రుణాల్లో ఏడాదికి రూ.8,814 కోట్ల మేర అంటే మొత్తం రూ.35 వేల కోట్లు కోత పడనుంది. గడిచిన ఆర్థిక సంవత్సరంలో తీసుకున్న బడ్జెట్ ఏతర రుణాల మొత్తాన్ని ఎఫ్ఆర్బీఎమ్ కిందే పరిగణించి నాలుగేళ్ల పాటు కేంద్రం కోత విధించింది. బడ్జెట్లో పేర్కొన్న అప్పులు కాకుండా వివిధ కార్పొరేషన్ల ద్వారా తీసుకున్న రుణాలపై అభ్యంతరం వ్యక్తం చేసిన కేంద్రం.. గడిచిన రెండేళ్లలో ఆ తరహాలో తీసుకున్న రుణాలను ప్రస్తుత ఆర్థిక సంవత్సరం ఎఫ్ఆర్బీఎమ్ పరిధిలోనే పరిగణిస్తామని మొదట తెలిపింది. అలా చేస్తే ప్రస్తుత ఏడాది రాష్ట్రానికి ఆర్థిక ఇబ్బందులు ఎదురవుతాయని.. అభివృద్ధి, సంక్షేమ కార్యక్రమాలు కుంటుపడతాయని రాష్ట్ర ప్రభుత్వం తెలిపింది.
Telangana Loans Latest News : పలు దఫాలుగా సంప్రదింపులు జరిపింది. రాష్ట్రప్రభుత్వ విజ్ఞప్తిపై స్పందించిన కేంద్ర ప్రభుత్వం 2021-22లో బడ్జెట్ వెలుపల తీసుకున్న అప్పుల మొత్తాన్ని నాలుగేళ్ల పాటు ఎఫ్ఆర్బీఎమ్ పరిధిలో భాగంగా పరిగణించేందుకు అంగీకరించింది. దీంతో గతేడాది తీసుకున్న రూ.35,257 కోట్ల బడ్జెటేతర రుణాన్ని ప్రస్తుత ఆర్థిక సంవత్సరం నుంచి నాలుగేళ్ల పాటు (2025-26) వరకు సర్దుబాటు చేసింది.
ఎఫ్ఆర్బీఎమ్ పరిధిలో ప్రభుత్వం తీసుకునే రుణాల్లో ఆ నాలుగేళ్ల పాటు రూ.8,814 కోట్ల చొప్పున కోత విధించనుంది. ప్రస్తుత ఆర్థిక సంవత్సరంలో బాండ్ల విక్రయం ద్వారా.. రూ.53,970 కోట్లను రుణాల ద్వారా సమీకరించుకోవాలని ప్రభుత్వం బడ్జెట్లో ప్రతిపాదించింది. రూ.8,814 కోట్లను కేంద్రం కోత విధించడంతో ఈ ఏడాది రూ.45,156 కోట్లు మాత్రమే అప్పుల ద్వారా సమీకరించుకోవాల్సి ఉంటుంది. రానున్న మూడు ఆర్థిక సంవత్సరాల్లోనూ ఎఫ్ఆర్బీఎమ్ పరిధిలో తీసుకునే అప్పుల్లో ప్రతి ఏటా రూ.8,814 కోట్లు కోత పడనుంది.
