లాక్డౌన్ ఎత్తివేతతో ఆలయాల్లో భక్తుల సందడి మొదలైంది. కరోనా నిబంధనలు పాటిస్తూ స్వామివార్ల దర్శనాలకు అనుమతిస్తుండటంతో భక్తులు ఆలయాలకు పోటెత్తారు. ప్రముఖ పుణ్యక్షేత్రం యాదాద్రిలో దర్శనాలు పున:ప్రారంభమయ్యాయి. కరోనా ఉద్ధృతి కారణంగా 38 రోజులుగా నిలిచిపోయిన దర్శనాలు.. దేవాదాయ శాఖ వారి ఉత్తర్వుల మేరకు నేటి నుంచి అందుబాటులోకి వచ్చాయి. ఫలితంగా భక్తులు పెద్దఎత్తున తరలివచ్చి స్వామివారిని దర్శించుకుంటున్నారు. బాలాలయంలో స్వామి వారి దర్శనానికి, ఆర్జిత సేవల్లో పాల్గొనేందుకు భక్తులకు అనుమతిస్తున్నారు.
46 రోజుల తర్వాత రామయ్య దర్శనం..
భద్రాచలంలో 46 రోజుల తర్వాత దర్శనాలు పునఃప్రారంభమయ్యాయి. సీతారామ చంద్రస్వామి వారికి ప్రత్యేక పూజల అనంతరం.. నిత్య కల్యాణాలు ప్రారంభించారు. నేటి నుంచి ఆలయంలో దర్శనాలకు అనుమతిస్తున్నట్లు అధికారులు ఎలాంటి సమాచారం ఇవ్వకపోవడంతో భక్తులు తక్కువ సంఖ్యలోనే వచ్చారు.
వేములవాడ రాజన్న..
రాజన్న సిరిసిల్ల జిల్లాలోని ప్రముఖ పుణ్యక్షేత్రం వేములవాడ రాజరాజేశ్వర స్వామి ఆలయం భక్తులతో కిటకిటలాడుతోంది. నెల రోజుల తర్వాత ఆలయ గుడి తలుపులు తెరుచుకోవడంతో భక్తులు పెద్దఎత్తున తరలివస్తున్నారు. కొవిడ్ నిబంధనలు పాటిస్తూ తమ మొక్కులు చెల్లించుకుంటున్నారు.
ఐదో శక్తిపీఠంలోనూ..
ఐదో శక్తిపీఠమైన జోగులాంబ బాల బ్రహ్మేశ్వర స్వామి ఆలయంలో భక్తులకు దర్శనాలు ప్రారంభమయ్యాయి. స్వామి అమ్మవార్లను దర్శించుకునేందుకు భక్తులు పెద్దసంఖ్యలో తరలివచ్చారు. ఉదయం నుంచే ఆలయానికి పోటెత్తి.. తమ మొక్కులు తీర్చుకున్నారు. చాలా రోజుల తర్వాత స్వామి, అమ్మవార్లను దర్శనం చేసుకోవడం చాలా ఆనందంగా ఉందని భక్తులు సంతోషం వ్యక్తం చేశారు.
కొమురెల్లి మల్లన్న దర్శనం..
ప్రముఖ పుణ్యక్షేత్రం సిద్దిపేట జిల్లా కొమురవెల్లి మల్లికార్జున స్వామి ఆలయంలో నేటి నుంచి భక్తులకు దర్శనాలను పునరుద్ధరిస్తున్నట్లు ఆలయ ఈవో బాలాజీ తెలిపారు. భక్తులు కరోనా నిబంధనలు పాటిస్తూ స్వామివారిని దర్శనం చేసుకోవచ్చని తెలిపారు. కరోనా నేపథ్యంలో మే 5 నుంచి తాత్కాలికంగా మల్లన్న దర్శనాన్ని నిలిపివేసిన ఆలయ అధికారులు.. లాక్డౌన్ ఎత్తివేత నిర్ణయంతో దర్శనాలను పున:ప్రారంభించారు. నేటి నుంచి ఆర్జిత సేవలు, పూజా కార్యక్రమాలకు భక్తులను అనుమతిస్తున్నారు.
కొండగట్టు అంజన్న ఆలయంలోనూ..
జగిత్యాల జిల్లాలోని ప్రసిద్ధ పుణ్యక్షేత్రం కొండగట్టు అంజన్న దర్శనానికి భక్తులను అనుమతిస్తున్నారు. స్వామి వారి దర్శనం కోసం వచ్చే భక్తులు మాస్క్ ధరించి, భౌతిక దూరం పాటించాలని ఆలయ ఈవో చంద్రశేఖర్ కోరారు. చాలా రోజుల తర్వాత భక్తులను ఆలయంలోకి అనుమతిస్తుండటంతో ఆలయాలు సందడిగా మారాయి.
మరోవైపు ఆలయాల్లో భక్తుల దర్శనాలకు అనుమతి కల్పించిన అధికారులు కరోనా నిబంధనలను తప్పనిసరి చేశారు. ప్రతి ఒక్కరూ మాస్కు ధరించి, భౌతిక దూరం పాటిస్తూ స్వామివార్ల దర్శనం చేసుకోవాలని సూచించారు.
ఇదీ చూడండి: SCHOOLS OPEN: జులై 1 నుంచి విద్యాసంస్థలు ప్రారంభం.. సోమవారం విధివిధానాలు!
