సూర్య గ్రహణం సందర్భంగా నేటి సాయంత్రం నుంచే ఆలాయల్లో దర్శనాలు నిలిచిపోనున్నాయి. రేపు ఉదయం 10 గంటల 18 నిమిషాల నుంచి మొదలుకానున్న గ్రహణం.. మధ్యాహ్న 1.38 గంటలకు ముగియనుంది.
తిరుమలలో..
ఈ రోజు రాత్రి 8.30 గంటలకు ఏకాంత సేవ ముగియగానే.. తిరుమల శ్రీవారి ఆలయాన్ని మూసివేయనున్నారు. తిరిగి.. గ్రహణం వీడిన తర్వాత ఆదివారం మధ్యాహ్నం 2.30 గంటలకు తెరుస్తారు. నిత్య కైంకర్యాల తర్వాత తిరిగి రాత్రి 8.30 గంటలకు ఏకాంత సేవ నిర్వహిస్తారు. గ్రహణం కారణంగా.. ఆర్జిత సేవలు రద్దు చేసిన తిరుమల తిరుపతి దేవస్థానం.. ఈ ఆదివారం నాడు భక్తుల దర్శనాలను సైతం పూర్తిగా రద్దు చేసింది.
ఇంద్రకీలాద్రిపై..
విజయవాడ ఇంద్రకీలాద్రిపై కొలువైన దుర్గామల్లేశ్వరస్వామి దేవస్థానాన్ని.. గ్రహణం సందర్భంగా నేటి సాయంత్రం 6 గంటలకే మూసివేయనున్నారు. పంచహారతులు, నివేదన అనంతరం.. కవాట బంధనం చేస్తారు. గ్రహణం వీడిన తర్వాత ఆదివారం మధ్యాహ్నం 2 గంటలకు.. ఆలయాన్ని శుద్ది చేస్తారు. అమ్మవారికి స్నపనాభిషేకం, అలంకరణ, హారతులు ఇస్తారు. గ్రహణం రోజున అన్ని రకాల ఆర్జిత సేవలను, దర్శనాలను నిలిపివేశారు. 22న.. సోమవారం ఉదయం 6 గంటల నుంచి భక్తులను దర్శనానికి అనుమతిస్తారు.
శ్రీశైలంలో..
శ్రీశైలం భ్రమరాంబామల్లికార్జున స్వామి దేవస్థానాన్ని గ్రహణం సందర్భంగా.. ఇవాళ రాత్రి 10 గంటలకు మూసివేయనున్నారు. ఆదివారం గ్రహణం వీడిన తర్వాత.. మంగళ హారతులు, కల్యాణోత్సవం ఏకాంతంగా నిర్వహిస్తారు. సోమవారం నుంచి యథావిథిగా దర్శనాలకు భక్తులను అనుమతిస్తారు. పశ్చిమ గోదావరి జిల్లాలోని ప్రముఖ క్షేత్రం ద్వారకా తిరుమల ఆలయమూ నేడు మూతపడనుంది. ఆదివారం నిత్య కల్యాణం, ఆర్జిత సేవలు, వాహన సేవలు రద్దు చేశారు. గ్రహణం అనంతరం ఆదివారం సాయంత్రం 7 గంటల నుంచి దర్శనాలకు భక్తులను అనుమతిస్తారు.
శ్రీకాళహస్తిలో..
ఆంధ్రప్రదేశ్లో శ్రీకాకుళం జిల్లాలోని అరసవల్లి సూర్యనారాయణస్వామి దేవాలయం ఇవాళ సాయంత్రం 5 గంటలకు మూసివేయనున్నారు. శుద్ధి అనంతరం రేపు సాయంత్రం 5 గంటలకు దర్శనాలకు భక్తులను అనుమతిస్తారు. శ్రీకూర్మంలోని కూర్మనాథస్వామి ఆలయాన్ని రేపు ఉదయం 6 గంటలకు మూసివేయనున్నారు. సాయంత్రం 6 గంటలకు దర్శనాలకు భక్తులను అనుమతిస్తారు. శ్రీముఖలింగేశ్వర స్వామి ఆలయాన్ని సాయంత్రం 6 గంటలకే మూసేసి.. ఆదివారం సాయంత్రం 4 గంటల తర్వాత దర్శనాలకు భక్తులను అనుమతిస్తారు.
మరికొన్ని...
ఏపీలోని విశాఖ జిల్లాలో ప్రముఖ క్షేత్రం సింహాచలం.. తూర్పు గోదావరి జిల్లా అన్నవరం.. కర్నూలు జిల్లా అహోబిలంతో పాటు.. మరిన్ని ఆలయాలు సంప్రదాయం ప్రకారం.. దర్శనాలు నిలిపివేయనున్నాయి. గ్రహణం విడిచిన తర్వాత సంప్రదాయ సంప్రోక్షణ నిర్వహించిన అనంతరం.. యథావిథిగా నిత్య పూజలు కొనసాగించనున్నారు.
కాళహస్తిలో యథాతథం
ఆంధ్రప్రదేశ్లో చిత్తూరు జిల్లా శ్రీకాళహస్తిలో ఎప్పటిమాదిరే.. గ్రహణం సందర్భంగా ఆలయాన్ని తెరిచి ఉంచనున్నారు. రాహు, కేతు, సర్ప దోష నివారణ పూజలకు ఖ్యాతి గాంచిన ఈ కోవెలలో.. ఉన్న స్వామివారు.. 27 నక్షత్రాలు, నవగ్రహాలను కవచంగా ధరించి ఉంటారు. ఈ కారణంగా.. ఎలాంటి గ్రహణాలు ఈ ఆలయానికి వర్తించవని పండితులు చెబుతారు. పైగా.. గ్రహణం రోజున స్వామి, అమ్మవార్లకు అభిషేకాలు నిర్వహిస్తారు. దర్శనాలకు భక్త జనం.. భారీగా తరలివస్తారు.
ఇదీ చదవండి: ఆదివారం సూర్యగ్రహణం.. ప్రత్యేకత ఏంటో తెలుసా..?
