Vinodkumar On Banks Strike : బ్యాంకర్ల సమ్మెకు తెలంగాణ ప్రభుత్వం పూర్తి మద్దతు ఇస్తున్నట్లు రాష్ట్ర ప్రణాళికా సంఘం ఉపాధ్యక్షుడు వినోద్కుమార్ ప్రకటించారు. అదానీ, అంబానీలకు ప్రభుత్వ రంగ బ్యాంకులను కట్టబెట్టేందుకు మోదీ కుట్ర చేస్తున్నారని ఆరోపించారు. హైదరాబాద్ సెంట్రల్‌ బ్యాంక్‌ ఆవరణలో జరుగుతున్న బ్యాంకర్ల సమ్మెలో రాష్ట్ర ప్రణాళికా సంఘం ఉపాధ్యక్షుడు వినోద్కుమార్, ప్రొఫెసర్‌ నాగేశ్వర్‌తో పాటు పలు పార్టీలకు చెందిన ప్రతినిధులు కూడా మద్దతు ప్రకటించారు. ఇందిరాగాంధీ హయాంలో బ్యాంకులను జాతీయకరణ చేయగా... మన్మోహన్ సింగ్ హయాంలో సంస్కరణల పేరుతో ప్రభుత్వ రంగ బ్యాంకులను కొంతదెబ్బతీశారని విమర్శించారు. గ్రామీణ ఆర్థిక వ్యవస్థను బలోపేతం చేయడంలో బ్యాంకులు కీలకపాత్ర పోషించాయని పేర్కొన్నారు.
బ్యాంకు సమ్మెపై సామాజిక మాధ్యమాల్లో భాజపా దుష్ప్రచారం చేస్తోందని మండిపడ్డారు. బ్యాంకులను ఎట్టి పరిస్థితుల్లోనూ ప్రైవేటుపరం కానివ్వబోమని పేర్కొన్నారు. లోక్సభ, రాజ్యసభ ఎక్కడ బ్యాంకు అమెండ్‌మెంట్‌ చట్టం బిల్లు వచ్చినా తమ పార్టీ వ్యతిరేకిస్తుందని, బ్యాంకర్ల సమ్మెకు తెరాస పూర్తి మద్దతు ఇస్తున్నట్లు వినోద్కుమార్ స్పష్టం చేశారు. బ్యాంకులు జాతీయ చేయడం వల్లనే దేశంలో ఆర్థిక వ్యవస్థ బలోపేతం కావడంతో పాటు గ్రామీణ ప్రాంతాల్లో ఆర్థిక వ్యవస్థ అభివృద్ధి చెందిందన్నారు.
భారతదేశం ఇవాళ ఇంత గొప్పగా ఆర్థికంగా నిలబడింది అంటే కేవలం జాతీయ బ్యాంకుల వల్లనే. వేల సంఖ్యలో బ్యాంకుల బ్రాంచీలు గ్రామీణ ప్రాంతాల్లోకి వెళ్లిన తర్వాత వ్యవసాయానికి వెన్నుగా నిలబడ్డాయి. జాతీయకరణ చేసిన బ్యాంకులను ఇవాళ అంబానీ, అదానీ గ్రూపులకు అమ్మడానికి సిద్ధంగా ఉంది కేంద్ర ప్రభుత్వం. ఇవాళ బ్యాంకింగ్ రెగ్యులేషన్ చట్టం.. పార్లమెంటులో సవరణ బిల్లు పెడితే అన్ని పార్టీల నాయకుల అభిప్రాయాలు తెలుసుకుని స్టాండింగ్ కమిటీ ముందు చర్చించవచ్చు. కానీ ఆ విధంగా చర్చించేందుకు కేంద్రం సిద్ధంగా లేదు.. ఈ బిల్లును వారికున్న మెజారిటీతో పాస్ చేయించుకునేందుకు ప్రయత్నిస్తున్నారు. - వినోద్‌ కుమార్, రాష్ట్ర ప్రణాళిక సంఘం ఉపాధ్యక్షుడు
ఇదీ చూడండి: Inter results: ఇంటర్‌ మొదటి సంవత్సరం పరీక్షల ఫలితాలు విడుదల
