కాచిగూడ రైలు ప్రమాదం తర్వాత రైల్వేస్టేషన్లో పునరుద్ధరణ పనులను ఆ శాఖ యుద్ధ ప్రాతిపదికన చేపట్టింది. ఇంటర్సిటీ ఎక్స్ప్రెస్, ఎంఎంటీఎస్ రైళ్లు ఢీకొన్న తర్వాత పట్టాలపై ఉన్న క్లిప్పులు విరిగిపోయాయి. పట్టాలు మార్చే వద్ద సాంకేతికపరమైన మార్పులు చోటుచేసుకున్నాయి. ప్రమాదం జరిగినప్పటి నుంచి పట్టాల మరమ్మతుతో పాటు విద్యుదీకరణ పనులు చేపట్టారు.
రేపు ఘటనపై విచారణ
ప్రాథమిక అంచనా ప్రకారం మానవ తప్పిదం వల్లే రైలు ప్రమాదం చోటుచేసుకుందని అధికారులు తెలిపారు. రేపు రైల్వే శాఖ ఉన్నతస్థాయి కమిటీ ఆధ్వర్యంలో విచారణ చేపట్టనుంది. ఘటనకు గల కారణాలు, సాంకేతిక అంశాలు, ప్రమాద సమయంలో డ్రైవర్ వ్యవహార శైలి తదితర అంశాలపై విచారణ చేపట్టనున్నట్లు అధికారులు పేర్కొన్నారు.
మొదటి, రెండు ట్రాక్లు పూర్తి
ఉదయం 11 గంటల నుంచి ఒకటో నంబర్ ట్రాక్ పూర్తిస్థాయిలో పనిచేసేలా చేశామన్నారు. ఈ ట్రాక్పై ఇప్పటికే తిరుపతి నుంచి సికింద్రాబాద్ వచ్చే సెవన్ హిల్స్ రైలు నడుస్తోంది. ఆ తర్వాత యశ్వంత్పుర- కాచిగూడ ఎక్స్ప్రెస్ కూడా రెండో ట్రాక్ నుంచి వెళ్లింది. ఇక మూడో ట్రాక్లో మాత్రమే కొంత పనులు జరుగుతున్నాయి.
త్వరలోనే..
పనులు పూర్తైన ట్రాక్లలో డీజిల్ ఇంజిన్ రైళ్లను నడుపుతున్నామని తెలిపారు. మిగిలిన పనులను కూడా వీలైనంత త్వరగా పూర్తిచేస్తామని అధికారులు తెలిపారు. ఈ పనులు కూడా పూర్తైతే.. పాక్షికంగా రద్దయిన రైళ్లు, పూర్తిగా రద్దయిన రైళ్లు, దారి మళ్లించిన రైళ్లను తిరిగి పునరుద్ధరిస్తామని రైల్వేశాఖ పేర్కొంది. విద్యుదీకరణ పనులు పూర్తికాగానే ఎంఎంటీఎస్ రైళ్లను యథావిధిగా నడుపుతామన్నారు.
ఇవీ చూడండి: మోయతుమ్మెద వాగులో మునిగి ముగ్గురు మృతి
