కుటుంబానికి దూరంగా ఉంటూ...
కరోనా కారణంగా ఏడాదిగా కుటుంబానికి దూరంగా ఉంటున్నాను. చిన్న పిల్లలు ఉన్నందున ఆసుపత్రిలో విధులు నిర్వహించి కరోనాను ఇంటికి మోసుకు పోతున్నానేమో అనే భయంతోనే దూరంగా ఉండాల్సి వస్తోంది. ఆసుపత్రికి వచ్చే రోగుల్లో ఒక్కొక్కరిది ఒక్కో పరిస్థితి. అందరినీ అర్థం చేసుకుని సేవలు అందించడం సవాలుతో కూడుకున్న పనే. మా సేవలు అందుకుంటున్న రోగులందరూ కోలుకుని ఇంటికి పోవాలని దేవున్ని కోరుకుంటున్నా.
యువకుడి మరణం కన్నీరు పెట్టించింది.
రోజు మాదిరిగానే ఆసుపత్రిలో విధులు నిర్వహిస్తున్నాను. ఓ రోజు ఓ యువకుడితో మాట్లాడి ఇంటికి వెళ్లాను. తిరిగి మరుసటి రోజు వచ్చేసరికి ఆ బెడ్‌ మీద అతను లేడు. మరో వార్డుకు మార్చారని అనుకున్నా.. మృతి చెందారని తెలిసి తట్టుకోలేక పోయాను. ఇలా కొంత మందికి జరిగిన ఘటనలు కన్నీళ్లు పెట్టించాయి. కొంత మంది వృద్ధులు జీవితంపై ఆశలు వదిలేసుకున్నారు. వారిలో భయం పోగొట్టి ఆ మనోవేదన నుంచి బయటకు తీసుకొచ్చాం. అలా కొంత మంది సాధారణ స్థితికి వచ్ఛి. ఇళ్లకు వెళ్లారు. అలాంటప్పుడు ఏదో సాధించిన అనుభూతి కలుగుతుంది. సహాయకులు లేని వారికి జ్యూస్‌లు తాగించడం, భోజనం తినిపించడం, ఆసుపత్రి సిబ్బంది సాయంతో డైపర్లు కూడా మార్చడం వంటివి చేస్తున్నాం.
నర్సులదే కీలక పాత్ర
కొవిడ్‌ మొదటి దశ నుంచి రెండో దశ వరకు ప్రతి ఒక్కరూ సెలవులు లేకుండా విధులు నిర్వహిస్తున్నారు. కొవిడ్‌ వార్డుల్లోకి అయినవారే వెళ్లేందుకు సుముఖత చూపించడం లేదు. మేము ఆత్మస్థైరంతో సేవలందిస్తున్నాం. మందులు, ఇంజక్షన్‌ల ప్రభావం ఎంత ఉంటుందో.. వారిలో ధైర్యం నింపితే అంతకంటే రెట్టింపు శక్తి వస్తుంది. వారి రోగాన్ని గుర్తు చేయకుండా కోలుకునేలా అవగాహన కల్పిస్తాం. ప్రతీ క్షణం అప్రమత్తంగా ఉంటూ వారి కదలికలను పరిశీలిస్తాము. ఎలాంటి సమస్య ఉన్నా వెంటనే స్పందిస్తాం.
మమ్మల్ని మేము మరిచిపోతున్నాం
బయట ఎన్ని సమస్యలున్నా ఆసుపత్రికి వెళ్తే మమ్మల్ని మేము మరిచిపోయి సేవలందిస్తాం. కొంత మంది దగ్గర ఫోన్‌లు కూడా అందుబాటులో ఉండవు. వారి కుటుంబ సభ్యులతో మాట్లాడిస్తాం. అప్పుడు వారిలో తెలియని సంతోషం కనిపిస్తుంది. ఆందోళన చెందకుండా కోలుకొని సంపూర్ణ ఆరోగ్యంతో ఇంటికి వెళ్తారని ధైర్యం నింపుతాం. పరిస్థితి విషమించి ఎవరైనా మృతి చెందితే ఆ ఆరోజు గడవడం కష్టంగా ఉంటుంది. కొవిడ్‌ వార్డులో పనిచేస్తున్నా ఇప్పటివరకు మహమ్మారి నుంచి నన్ను నేను కాపాడుకుంటున్నా.
సంతోషంగా ఇళ్లకు పంపిస్తున్నాం
ఆసుపత్రికి వచ్చిన ప్రతి కొవిడ్‌ బాధితుడు కోలుకొని సంపూర్ణ ఆరోగ్యంతో ఇంటికి వెళ్లాలని కోరుకుంటాం. ఇక్కడికి వచ్చిన వారిని చూస్తే.. ఎంతో బాధనిపిస్తుంది. ఇక్కడి నుంచి ఆరోగ్యంగా వెళ్తే.. ఆరోజు ఎంతో సంతోషంగా ఉంటుంది. అప్పటి వరకు పడ్డ కష్టాన్ని ఒక్కసారిగా మరిచిపోతాం. ఒక్కసారి వార్డులోకి వస్తే అన్నీ మేమే చూసుకుంటాం. ఇటీవల మా అబ్బాయికి కొవిడ్‌ వచ్చింది. ఎలాంటి ఆందోళన లేకుండా ధైర్యం చెప్పాను. పది రోజుల్లోనే కోలుకున్నాడు. ధైర్యంగా ఉంటే వైరస్‌ను జయించొచ్చు.
ఇదీ చదవండి: సరిహద్దుల్లో అంబులెన్స్లను అడ్డుకోవద్దు: హైకోర్టు
